Министерството за внатрешни работи (МВР) презеде обемни активности за пронаоѓање на исчезнатата 43-годишна Лидија Трајковска, која исчезна под мистериозни околности на пат кон село Драчево.
Според информациите од МВР, Трајковска последен пат била видена во близина на раскрсницата во нејзиното село Јурумлери, од каде се упатила кон Драчево. Полицијата ги прегледува сите познати локации на нејзиното последно движење, а во потрагата активно учествуваат и нејзини роднини.
Полициски службеници во близина на мостот на реката Вардар пронашле неколку предмети, меѓу кои кутија од цигари, запалка и џемпер. Сопругот на Лидија потврдил дека кутијата и запалката ѝ припаѓале, додека џемперот не бил препознаен како нејзин. Пребарувањето продолжува долж течението на реката, каде што полицијата и семејството заеднички вршат обиколки во надеж дека ќе се најдат дополнителни траги.
„За да се опфати пошироката област околу реката Вардар, МВР ангажира дрон за воздушно пребарување, со што се покрива подрачје во должина од пет километри, од село Јурумлери до село Огњанци. Дополнително, полицијата пребарува и напуштени објекти во околината, а сите сили се насочени кон најбрзо лоцирање на исчезнатата жена“, велат од МВР.
Од министерството за внатрешни работи упатија апел до јавноста за соработка и повика секој што има каква било информација за исчезнатата Лидија Трајковска да се јави во полиција. Потрагата како што наведуваат од таму продолжува со засилен интензитет и мобилизирање на сите ресурси, со цел да се пронајде исчезнатата што е можно побрзо.
