ФИФА испрати парична „честитка“ до Албанската федерација за пропусти за време на мечот во Скадар меѓу домашната репрезентација и Македонија во квалификациите за СП 2018.

Куќата на фудбалот на западниот сосед ќе мора да плати 50.000 швајцарски франци, казна што е образложена со свирежи на македонската химна, за скандирање и истакнување на пораки со политичка содржина и конотација, за напад кон гостински навивачи на стадионот „Лоро Боричи“.

Албанија ја совлада Македонија со 2:1 во премиерниот меч од групата Г во мундијалските квалификации. Натпреварот во Скадар имаше два дела – почна на 5 септември, а заврши на 6. Беше прекинат во 77 минута при резултат 1:1 поради силно невреме и обилни врнежи од дожд.