За Македонците со бугарски пасоши од Бугарија почнаа да стигаат казни високи и до илјада лева. Казнети се затоа што во мај лани гласале на европските избори во бугарските конзуларни претставништва, а немале право, пренесува „Телма“.
Најмногу постапки според бугарските медиуми се водат во пограничните градови Благоевград и Ќустендил каде што се домашните адреси на многу новопечени македонски Бугари. Во Благоевград се покренати постапки за 283 иматели на двојни пасоши, во Ќустендил за 250 двојни државјани.
Обвинителка од Благоевград за „Телма“ објаснува дека Македонците згрешиле по два закона.
Затоа што го искористиле гласачкото право иако немале право поради неисполнување на условот за живеалиште. Под тој услов за да се гласа на европските избори мора пред денот на одржувањето, непрекинато најмалку три месеци да имаат живеалиште односно престојувалиште во Бугарија или во земја членка на ЕУ.
Вториот престап е што тие самите пред избирачките одбори декларирале дека имаат избирачко право – изјави Весела Стоилова, обвинителка и портпарол на Обвинителството во Благоевград, Бугарија.
Казната за Македонците гласачи со бугарски пасоши во Ќустендил е илјада лева, односно 500 евра.
