ЕУ ќе и додели 160 милиони евра на Северна Македонија за спас од економскиот колапс од пандемијата со ковид-19

Европската комисија одлучи на Северна Македонија да и додели 160 милиони евра од пакетот за макрофинансиска помош, МФП, како поддршка на економијата во земјата која е погодена од корона вирусот. Целиот пакетот кој се однесува на 10 земји, е тежок вкупно 3 милијарди евра и е наменет за зајакнување на фискалното управување и транспарентноста, борбата против корупцијата, подобрување на финансискиот сектор и на деловното опкружување и справување со невработеноста кај младите.

„Комисијата договори Меморандуми за разбирање за програми за макрофинансиска помош (МФП) со осум партнери. Договорите се дел од Пакетот за МФП од вкупно 3 милијарди евра за десет земји кои се во процесот на проширување и за земји од соседството, со цел да им се помогне да го ограничат економскиот колапс од пандемијата. Тековната и брза имплементација на овие програми е важен показател на солидарноста на ЕУ во време на криза од претходно невидени размери“, се вели во соопштението испратено од Брисел.

Инаку, Меморандумите за разбирање се веќе договорени со Албанија, Грузија, Јордан, Косово, Молдавија, Црна Гора, Северна Македонија и Украина, а документите се официјално потпишани со четири од нив: Косово, Молдавија, Северна Македонија и Украина. Во тек се преговорите со Босна и Херцеговина и Тунис.

Валдис Домбровскис, извршен потпретседател за економија која базира на социјална праведност и просперитет, изјави: „Како дел од глобалниот одговор на ЕУ на пандемијата со корона вирусот, се трудиме да им помогнеме на нашите соседни земји да го ублажат најлошиот економски удар. Овие „кризни програми за МФП“ ќе бидат дефинирани со конкретни реформски обврски. На тој начин ќе им се помогне на соседните земји да ги покријат потребите од надворешно финансирање во периодот 2020-21 година, во справувањето со економскиот удар од пандемијата.“

Според Паоло Гентилони, Комесар за економија, пандемијата со ковид-19 има невидени економски и социјални удари врз земјите од целиот свет. „Оние кои се во процес на проширување, како и земјите од соседството се сериозно погодени, а ние како Унија имаме финансиска сила да им помогнеме да го ограничат економскиот колапс“, рече тој.

Според договорите, Албанија ќе добие 180 милиони евра за зајакнување на јавните финансии и отпорност на финансискиот сектор, подобрување на владеењето и борбата против корупцијата и унапредување на социјалната заштита, Грузија 150 милиони евра, Јордан 700 милиони евра, Косово 100 милиони евра, Молдавија 100 милиони евра, Црна Гора 60 милиони евра и Украина 1,2 милијарди евра.

Меморандумите се чекор кон првото доделување на средства во рамки на програмите, што е условено со политички предуслови, почитување на демократските принципи, човековите права и владеењето на правото. Земјите-кориснички би требало да се корисници и на програмата за финансиска помош од ММФ.

МФП е дел од поширокиот ангажман на ЕУ со земјите од соседството и оние кои се во процес на проширување и е наменета како инструмент за реакција во случај на кризи. Одлуката за доделување на оваа помош на десет земји, во контекст на ковид-19 пандемијата беше предложена од Комисијата на 22 април и усвоена од Европскиот парламент и Советот на 25 мај годинава.

Презентирана Националната платформа за онлајн учење

Учебната 2020-2021 година ќе се одвива преку Националната платформа за онлајн учење, која е инклузивна, едноставна за користење и нуди учење на пет јазици. Платформата е практична, лесна за користење и го доближува образованието и наставните содржини до учениците на каналите кои тие секако често ги користат.

Ученикот преку компјутер или телефон ќе може да ја гледа училницита и наставникот и ќе може да ги користи сите поставени аудио и видео материјали на платформата и да ги изработува домашните задачи, а наставата нема да биде здодевна и ќе има брзи квизови, тестови и други иновативни содржини.

Обуките за користење во прво ниво опафтиле 30 национални обучувачи, во второ ниво се опфатени 1 600 наставници номинирани за училишни обучувачи и тие понатаму ќе треба да ги обучат сите наставници на ниво на поедини училишта.

Премиерот Зоран Заев, на денешната прес-конференција за промоцијата на платформиата, ги повика сите и наставниците и родителите да го поддржат процесот, а на децата им порача да ги зграпчат сите можности, зошто доброто образование гради слободни граѓани.

– Пандемијата ја наметна потребата да согледаме зошто ни е потребен образовен систем во добра кондиција и дека посветено треба да работиме на негова дигитализација, реформа и подобрување. За прв пат создадовме единствена национална платформа за оналјн учење, што ја креиравме исклучиво со домашни ресурси и експерти. Ова не охрабрува и дава поттик за нејзино усовршување и прилагодување на потребите на секој ученик во нашата држава, изјави Заев.

Посочи дека платформата е прилагодена освен на македонски, за држење настава на албански, турски, српски и бошњачки јазик.

– Подготвеноста на институциите и образовниот систем за промени е доказ за континуирана посветеноста кон долгорочните цели – квалитетно и иновативно образование по мерка на секого. Како Влада ја даваме безрезервната поддршка за имплементација на овој процес, истакна Заев.

Пандемијата, порача тој, недвосмиселно покажа дека како држава треба многу да научиме за планирање на инвестициите во образованието и колку е се тоа важно за сите нас.

Министерката за образование и наука Мила Царовска, рече дека подготовката на платформата е влог во иднината и модернизација на образованието.

– Платформата е првиот исчекор кон модернизација на образованието. Нова алатака, која сум убедена дека ќе биде значаен ресурс и по надминување на кризата со корона вирусот. Периодот што следи нема да биде лесен ниту за професиорите, ниту за родителите, ниту за учениците. Промените се секогаш тешки и прилагодувањето бара огромна жртва од сите нас, изјави Царовска.

Комбинираниот пристап што го избравме, Царовска изрази уверуавње, дека ќе обезбеди добар баланс меѓу обезбедување на добро образование и заштита на  јавното здравје.

– Учениците ќе може да предлагаат надоградување и менување на платформата и со тоа директно ќе се вклучуваат во изработка на решенија што тие ги сметаат за прилагодени на нив. Платформата ќе овозможи учениците и просветните работници заедно да го унапредуваат нашети образование не само за сега, туку и за иднина, порача Царовска.

Национланата платформа за учење од далечина е резултат на соработка на МОН, Факултетот за информатички науки и компкутерско инжинерство и МАСИТ. 

Врховен ги потврди казните затвор за Груевски, Поповски и Јанкулоска

Врховниот суд ги одби поднесените барања на осудените Никола Груевски, Ѓоко Поповски и Гордана Јанкулоска во случајот „Тенк“ и ги потврди пресудите на Апелациониот суд Скопје.

Поранешниот помошник министер за внатрешни работи Ѓоко Поповски беше осуден на шест години и шест месеци затвор и тој веќе е на издржување на казната.

Второобвинетиот, поранешен премиер Никола Груевски како поттикнувач за сторување на делото е осуден на две години затвор.

Апелациониот суд Скопје откако делумно ги уважи жалбите на обвинетата Гордана Јанкулоска за предметот „Тенк“ и ја намали казната затвор од шест на четири години.

Тројцата се осудени дека во периодот од февруари до крајот на октомври 2012 година Никола Груевски како службено лице ги искористил влијанието и службената положба и побарал од министерката за внатрешни работи Гордана Јанкулоска, да спроведе јавна набавка во која Министерството ќе купи ново блиндирано патничко моторно возило „мерцедес“, модел „С-600 гард“, а во постапката бил фаворизиран економскиот оператор М.А. ДООЕЛ, генерален застапник и дистрибутер на возилата од брендот „Мерцедес“.

Возилото беше купено за 600 илјади евра.

Филипче: Во училиште можби ќе се вратат и другите одделенија

Од 1 октомври, со физичко присуство во училиште би можеле да одат и други одделенија. Одлуката за промена на режимот на движење за граѓаните треба да биде донесена на следната онлајн-средба меѓу здравствените власти на земјите од Западен Балкан, Бугарија и Грција, најавува министерот за здравство Венко Филипчe.

„Враќање на училиште и на други одделенија може само во ситуација кога вкупниот број на деца во одделенијата или бројот на класови во училиштето е толку мал да сметаат епиде*иолозите дека е ризикот мал, односно ист или помал. На пример, имаме регионално училишта во кое учениците се заедно во едно одделение од прво до петто, од 10 до 15 или 7 деца. Ги анализиравме училиштата, на тие ќе им дозволиме, но ако веќе има една одредена бројка на деца, 20-на од прво до трето одделение нема да се дозволи на останатите одделенија, заради тоа што со тоа ризикот се мултиплицира. Еден е ризикот да бидат стотина деца од прво до трето одделение со физичко присуство во училиштата, ама повеќе од двојно ќе биде ризикот уште толку деца да ставиме од четврто, петто и шесто одделение на почетокот на октомври, бидејќи тие се во контакт со истите наставници. На пример, ако е некоја наставничка позитивна и дојде во контакт со голем број на деца тие се сите во ризик. Затоа одиме дел по дел“, вели министерот Филипче.

Следната недела се очекува одлука за отворање на границите меѓу земјите во регионот, најавува Филипче.

„Одлуката за промена на режимот на движење за граѓаните од регионот, кој беше воспоставен од почетокот на здравствената криза, треба да биде донесена на следната онлајн-средба меѓу здравствените власти на земјите од Западен Балкан, Бугарија и Грција. Епи*емиолошката состојба е слична во целиот регион, па властите во земјите најавија координативен совет за заедничко дејствување во донесувањето одлуки за болеста. Но, претходно треба да се укине условот за ПЦР-тест за да се премине границата“, рече Филипче.

Популарно