Картички по 6.000 денари – еве до кога ќе бидат готови и до кога ќе треба да се потрошат парите

За најмногу два месеци или веќе кон средината на ноември банките ќе ги испорачаат картичките на граѓаните кои влегуваат во категориите и им следува домашна платежна картичка на износ од 6.000 денари. Списоците ќе бидат објавени кон средината на октомври, а парите најверојатно ќе треба да се потрошат до крајот на годината.

Премиерот Зоран Заев го промовираше продолжението од проектот Купувам домашно со картички кои овојпат ќе опфатат 283.000 луѓе. Ова е дел од четвртиот пакет антикризни мерки, а државата за нив издвојува 27,6 милиони евра.

Овој пат платежни картички со износ од 6.000 денари ќе добијат 5.726 самохрани родители, пензионерите со пензии до 15.000 денари кои се околу 182.271, невработените кои се пасивни баратели на работа, односно 85.108 граѓани, самостојните уметници, филмски работници, културни работници и естрадни уметници чија бројка е 520 корисници.

Ваква картичка ќе добијат и 540 студенти кои не добиле во претходниот пакет, плус поддршка за ученички и студентски стандард од 44 милиони денари за 2020 година добиваат 884 студенти и 347 ученици. Право на картичка ќе има и граѓаните кои навршиле возраст за пензионирање, ама немаат пензија ниту државна социјална пензија и се со приходи пониски од 15.000 денари, или воопшто немаат приходи.

Граѓаните не треба да аплицираат, туку ќе се најдат на списоците кои ќе бидат објавени.

Нов удар - за колку ќе се покачи цената на струјата?

За увоз на струја досега потрошени над 3 милиони евра. Поради сушата АД ЕСМ во овој месец набавиле од странство над 60 илјади мегават часови, по просечна цена од 53 евра за мегават час, велат од компанијата.

- Напоменуваме дека целта на АД ЕСМ е во иднина, согласно законот за енергетика од 2018г и либерализирањето на пазарот за електрична енергија, преку својата фирма ЕЛЕМ Трејд да го развива трејдингот, односно купувањето и продавањето на електрична енергија, во зависност од цената на струјата на берзите, се вели во дописот на АД ЕСМ.

Откако Владата одлучи да ја стопира работата на хидроцентралите поради празните акумуации, недостатокот на електрична енергија се  обезбедува од надвор.

Од друга страна метеролозите не најавуваат некој промени  и најверојанто увозот на струја ќе продолжи и во следните месеци.

Но дали тоа ќе повлече ново зголемување на цената, ќе се знае до средината на декември. До тогаш ќе важи шестмесечниот договор кој АД ЕСМ го има со Универзалниот снабдувач.

Во август цената на струјата се зголеми за 7,4 проценти, со образложение дека приходите на државните енергетки компании се намалени поради пандемијата, а неопходни се инвестиции во мрежата за да се обезбеди сигурно снабдување на домаќинствата со струја.

Рафајловски: Зголемувањето на данокот за куќа и стан во кој не се живее е популистичка мерка

Економскиот експерт Горан Рафајловски иницијативата на Владата за зголемување на данокот на имот за становите и куќите во кои сопствениците не живеат ја оцени како популистичка.

- Станува збор за уште едно катастрофално решение, како што беше данокот од 18 проценти за богатите. Јас се сложувам дека треба да се плати повеќе ако не се користи, но тоа треба добро да се пресмета. Ако сакате една милијарда во касата, треба сериозно да се работи во економскиот дел од владеењето, вели Рафајловски за Канал 5.

Педлогот на закон за изменување и дополнување на Законот за даноците на имот., се најде на една од последните владини седници, но последните информации велат дека е вратен на доработка и треба да се најде на некоја од наредните седници повторно.

Премиерот Зоран Заев во интервју веќе најави дека ќе се менува овој закон и најави дека за втор стан, за куќа во која не се живее, или за деловен простор што не се користи, даночните стапки ќе бидат поголеми за трипати во однос данокот кој се плаќа за простор кој се користи. 

Премиерот вели дека треба да се зголеми данокот на имот поседот на недвижности кои не се во употреба. 

„Во него ставаме трипати повисок данок на имот за сите што имаат втор стан, трета куќа, деловен простор, сѐ што не е искористено, пред сѐ од државата, рече Заев во интервју за Дојчле Веле. 

Даноците на имот ги наплатуваат општините. Стапката е пропорционална и се движи од 0,1 до 0,2 проценти од пазарната вредност, а данокот се намалува за 50 отсто за станот или за куќата во која се живее.

Нема да има изедначување, жените сепак во пензија ќе одат на 62 години

Последните измени на Законот за работни односи со кои се предвидува задолжително пензионирање на 64-годишна возраст, поднесени од група пратеници, влегоа во собраниска процедура и го поминаа првото читање, според кој нема да има изедначување на старосната граница за мажите и жените, како што првично најавуваше Владата.

Последно е дека во измените на овој закон се предвидува задолжително пензионирање на 64 години, но, сепак останува можноста жените да се пензионираат и на 62 години, како што е регулирано во Законот за пензиско и инвалидско осигурување.

Пред два и пол месеци вицепремиерот за економски прашања Фатмир Битиќи рече дека нема да има намалување на старосната граница за пензионирање, но во пензиските реформи ќе има изедначување на годините за пензионирање на мажите и жените.

„Ние пензиските реформи ги навестивме и веќе следната недела имаме меѓусекторски состанок. Сакам да потенцирам дека во предвидените измени не е планирано намалување на возрасната граница за пензионирање туку изедначување на возраста за пензионирањето меѓу мажите и жените што е и уставна категорија, рече тогаш Битиќи.

Изедначувањето сепак не беше споменето во програмата на Владата за новиот мандат. Владата планираше да даде можност за предвремено пензионирање, но со намалување на износот за пензија. Дополнително беше најавено и дека мажите и жените ќе се пензионираат задолжително со навршување на годините за пензија односно 62 години за жени и 64 за мажи.

Според новото законско решение, пензионирањето со навршени 64 години ќе биде задолжително во јавниот и приватниот сектор, со исклучок на здравството и образованието, од 2022 година.

Популарно