Маричиќ од Љубљана: Местото на Северна Македонија ќе биде во новите граници на ЕУ

Заменик претседателот на Владата задолжен за европски прашања денеска е во официјална посета на Љубљана, каде оствари средба со државниот секретар за меѓународни прашања при Владата на Република Словенија, Војко Волк.

На средбата беше разговарано за односите помеѓу Северна Македонија и ЕУ и плановите на нашата земја за продолжување на преговорите со ЕУ, за што од страна на Волк беше потврдена силната заложба на Словенија за активирање на политиката за проширување на ЕУ со земјите од Западен Балкан и напредокот на Северна Македонија на патот кон ЕУ.

-Потврдата дека имаме многу европски пријатели кои ја препознаваат нашата држава како идна членка на ЕУ дополнително нѐ охрабрува да продолжиме со реформите и влева оптимизам дека ќе успееме во процесите кои сме ги започнале, посочи на средбата вицепремиерот Маричиќ.

Во тој контекст вицепремиерот Маричиќ укажа дека Владата е максимално посветена на евроинтегративниот процес и на спроведувањето на реформите кои – преку примената на европските стандарди и вредности, им служат на граѓаните и на модернизацијата на државата, посочувајќи дека посебно внимание се дава на реформите во поглавјата 23 и 24, односно во областите на правдата, борбата против криминалот и корупцијата, малцинските права и слободата на медиумите.

Соговорниците разговараа и за исклучително добрите односи меѓу двете земји на политички, економски, културен и економски план и можноста за нивно унапредување.

Маричиќ во рамки на работната посета во Љубљана во македонската Амбасада ќе ги сретне и студентите од Македонската студентска организација во Словенија (МСОС) и македонските иселеници во Љубљана, а ќе присуствува и на настанот на првиот Форум на Европски Балкан, 20 години по Самитот на ЕУ во Солун, каде ќе се обрати на тркалезна маса на тема: „Моменталниот однос на ЕУ кон Земјите од Балканот“.

„Нефрон“: Апелираме да се преиспита одлуката за разрешување на Јовев

Апелираме да се преиспита одлуката за разрешување на директорот, професор доктор Сашко Јовев, а за евентуално направените грешки и пропусти во работењето, доколку ги има, соодветно нека биде казнет со други мерки, но, да не се казнуваат пациентите или оние кои чекаат трансплантација, затоа што сите сме свесни дека Националната програма за трансплантација на органи се темели најмногу на ентузијазмот на поединците и посветеноста на тимот. Ова се наведува во денешното соопштение на Здружението на бубрежно болни граѓани „Нефрон“ од Скопје.

- Сѐ она што се појави како информација по социјалните мрежи и медиумите за разрешувањето на професор доктор Јовев, директор на Клиниката за кардиохирургија, нѐ вознемири како здружение на граѓани, како пациенти кои чекаат трансплантација и како единствено здружение на бубрежно болни, кое наназад 20 години ја води кампањата за органодарителство и трансплантација на органи, пишува во соопштението.

Од таа причина, решиле да го споделат нивното мислење и загриженост во врска со овој случај.

- Ни во еден момент не сакаме да судиме или браниме и доколку постојат основани причини и грешки во работењето на професор доктор Јовев и Клиниката за кардиохирургија со која тој раководи, постојат процедури и дисциплински мерки со кои истите можат да бидат санкционирани. Но, мораме да се сложиме дека во најтешките времиња во текот на пандемијата со Ковид 19, под водство на професор доктор Јовев и тимот за трансплантација се направи голем исчекор во медицината со првата трансплантација на срце во Македонија, која силно и позитивно одекна не само кај нас во државата, туку и пошироко. Направените 8 трансплантации на срце спасија осум животи и влејаа надеж кај пациентите кои чекаа да им се трансплантира срце, дека најпосле и тие ќе имаат решение за нивните проблеми и ќе продолжат да живеат. Се радувавме со нив, особено затоа што пациентите кои чекаат трансплантација на бубрег имаме опција за живот - тоа е дијализата, а за пациентите кои чекаат трансплантација на срце тоа беше единствениот начин да продолжат да живеат, се додава во соопштението.

Од Здружението истакнуваат дека „не смееме да заборавиме дека како предводник на тимот за трансплантација на срце, докторот Сашко Јовев за првпат направи уште еден голем подвиг несвојствен за Македонија и ги обедини најголемите експерти од областа на јавното и од приватното здравство, со што тој успех беше уште поголем“.

- Епилогот на оваа оптужба и разрешување на професорот Јовев најверојатно ќе заврши како и многу досега, со водење на долги процеси за проценка на стручноста и компетентноста на работењето на лекарите во лекувањето на пациентите, со долги беспредметни судски процеси и долги рокови на процесуирање кои на крајот завршуваат со неутврдување на одговорност и вина, но кој ќе ја понесе одговорноста за направените штети кон професорот Јовев, Клиниката за кардиохирургија, целокупното македонско здравство, а посебно кон пациентите, прашуваат од Здружението.

Затоа, додаваат, „повикуваме во прв план да се стават потребите и животите на пациентите кои чекаат трансплантација на срце и други кардиохируршки интервенции, а суетите по страна“.

Радевска-Стефкова и Герасимовски поднесоа оставки од Судскиот совет

Членовите на Судскиот совет Мирјана Радевска-Стефкова и Зоран Герасимовски поднесоа оставки од функциите, потврдија за МИА од Судскиот совет.

Апелациониот судија Зоран Герасимовски и врховната судијка Мирјана Радевска-Стефкова беа избрани за членови на Советот на непосредни избори, од редот на судиите.

Оставките се депонирани денеска во архивата на Судскиот совет, а причините засега се непознати.

160 арачиновци без струја, тројца соселани не дозволуват ЕВН да го санира дефектот

Веќе шест дена без струја се 160 жители на Арачиново бидејќи не може да се поправи дефект на извод на дистрибутивната мрежа на ЕВН, зашто тројца арачиновци не дозволуваат такво нешто, објави „Плусинфо“.

Арачиновците А.Ќ., Р.С. и Д.Н. не биле загрижени за нивните соседи кои мора да живеат во мрак и ги спречувале екипите на ЕВН да го санираат дефектот.

Од ЕВН за велат дека ги користат сите правни мерки за да се реши проблемот.

Популарно