Почетокот на јануари, како по традиција, е резервиран за вирусни респираторни инфекции од кои се жалат голем број граѓани. Студеното време, но и празничните собири на повеќе луѓе во затворени простории, си го направија своето. Загадениот воздух во Скопје воопшто не им оди во прилог на заболените од респираторни инфекции.
Присутен е респираторен вирус, но и тука е сезонскиот грип, алармираат медицинските лица. Пациентите се жалат на висока температура, кашлица, болки во грлото, чуден секрет од нос, губење на апетитот, но и малаксаност и треска кои траат со денови.
Ширењето на сезонскиот грип ги наполни и речиси сите кревети на Клиниката за детски белодробни заболувања. Во Козле лежат 60 деца од сите возрасти и на сите одделенија, додека 6 од нив се на одделението за интензивна нега и им се нуди кислородна поддршка.
На социјалните мрежи се споделуваат искуства со вирусот, за кој многумина велат дека е „тешок“ како корона вирусот. Родителите се жалат на висока температура кај децата која со денови не се спушта.
- Работете на имунитетот и избегнувајте контакти со заразени. Со денови не се станува од кревет од овогодишениот вирус. Не помагаат антибиотици, споделива скопјанец.
- Се кашла 3-4 недели во најлош случај. Секако кај имунокомпримитирана популација може и смртен да е. Инаку е респираторен вирус, споделува една скопјанка.
- Епидемија има, ни еден респираторен вирус нема траен имунитет. И риновирус има епидемии ама дека се задржува на нос и грло никој не се замара. Сега има повеќе случаи со бронхити и болниците се полни.
- Не треба паника. Секоја година од декември до март има епидемии на некој респираторен вирус. Поитребен е природен тек, работа на имунитетот, и да не се влева страв дека ќе има нови пандемии бидејќи и стресот влијае на имунитетот на организмот, коментира една пациентка.
Лекарите, стандардно, за вирусите препорачуваат да се лекуваат симптомите со внес на многу течности и витамини, одмор и престој на чист воздух или во природа, но и лесни лекови за намалување на температура и спрееви и инхалации за нос и грло.
