Кога ниту вештачкото оплодување не успева, многу жени спасот го бараат во вербата. Дел од жителите на Скопска Црна Гора раскажуваат за неверојатната приказна за трудното дрво кај манастирот "Св. Богородица", кое на многу жени им помогнало да забременат, пренесува Вечер во својата репортажа.

На четириесетина минути оддалеченост од Скопје, на височините на планината Скопска Црна Гора, се наоѓа манастирот "Света Богородица". Во дворот на манастирот ќе го видите дрвото кое наликува на трудна жена, а за кое приказната вели дека им помогнало да забременат на многу жени кои биле неплодни. Можеби во ерата на модерна технологија за многумина оваа приказна би била неверојатна, но за домарот на црквата, дедо Милош, и за локалните жители оваа дрво им донело само среќа во домот на оние што го посетиле.

До таму се стигнува поминувајќи низ селата Бањани и Горњани, а потоа се продолжува кон рудникот Бањани". Уште стотина метри погоре, ќе дојдете до знакот на кој пишува дека до манастирот има уште триста метри. Можеби возејќи натаму ќе заталкате во некоја од тесните улички, но секогаш можете да застанете и да прашате некој од љубезните мештани да ви каже како се стигнува до манастирот, или пак, прашајте за дедо Милош, кој живее долги години таму и веднаш ќе ви објаснат како да стигнете. Ќе се изненадите кога жителите уште пред да прашате за местото, ќе ви кажат се за дрвото.

Приказната за трудното дрво се случила пред две години, за кое, како што велат мештаните и домаќини на манастирот, им помага на сите коишто посакуваат, а не можат да имаат деца. Во дворот на манастирот седеле тројца мажи, дедо Милош, овчарот и уште еден нивни пријател, кога се појавил човек од Скопје, кој се претставил како Илија. Тој им раскажал на присутните оти сонил дека токму во тој манастир се наоѓа бремена жена. Тројцата мажи се насмеале и му кажеле дека тоа не е можно, бидејќи во манастирот има само мажи. Но, сепак Илија бил упорен и тврдел дека на ова место има жена која е во блажена состојба. Тој започнал да бара и го нашол дрвото кое личи на стомак на трудница. На дедо Милош и на неговите пријатели не им се верувало во тоа што го гледаат, а дедо Милош вели дека никогаш порано не го забележал тоа дрво, ниту пак неговиот израсток.

- Јас се грижам за манастирот 60 години, но никогаш не сум го забележал дрвото со стомакот, божја волја е тоа, вели дедо Милош.

При нашата посета на манастирот и на дрвото го сретнавме Дарко К. од селото Бањани. Тој, неговата сопруга и нивните две деца се грижат за манастирот и му помагаат на дедо Милош, бидејќи е премногу стар и не може да се грижи сам за него. Дарко, кој го подготвуваше манастирот за ладните денови што доаѓаат, ни ја дораскажа приказната за дрвото за кое вели дека никогаш порано не го видел иако е чест гостин на местото.

- Многу години доаѓам тука, но никогаш не сум го видел дрвото. Откако го најде Илија, тој ни кажа дека тоа дрво ќе им помага на жените кои не можат да имаат деца и дека тука ќе доаѓаат да се молат. Ни кажа дека треба да го покриеме дрвото, да ставиме икона и крст кај што се наоѓа. Илија ни остави и молитва којашто треба да ја прочитаат сите кои ќе доаѓаат да побараат помош и ни објасни што треба да направат тие што ќе дојдат. На секоја жена која ќе дојде да побара помош, ние и кажуваме што треба да направи и не смееме никого да вратиме назад без разлика на нејзината националност и вера, раскажува Дарко К.

Најпрво треба да се наполни вода од манастирската чешма, мажот и жената потоа треба да се помолат внатре во манастирот и да ја кажат молитвата, да ги замијат рацете со водата, потоа да се упатат кон дрвото и таму да го сторат истото. Од кај дрвото треба да си продолжат кон своите домови од друга страна, бидејќи не треба да се вратат повторно до манастирот штом еднаш отишле до дрвото, објасни Дарко.

Тој вели дека голем дел од оние што го посетиле местото и сега имаат деца се вратиле со подароци за манастирот.

- Од нашето село Бањани има девојка која остана бремена откако беше тука, а исто така има жени од Скопје и Велес кои останале бремени, вели Дарко.

Во манастирот го сретнавме и Игор М., кој со своето семејство беше дојден да ги посети манастирот и дедо Милош. Тој ни раскажа дека долги години доаѓа тука, бидејќи во овој манастир имало нешто посебно. Игор ни кажа дека лично познава девојка која до својата 37 година не можела да има дете и покрај тоа што се обидувала и со вештачко оплодување. Но, откако дошла кај трудното дрво, по една година добила ќеркичка. Освен што доаѓа долго време во манастирот, има и донирано врати за конаците за спиење, а се надева дека во скоро време манастирот ќе добие и струја. Кога медицината не помага, вели тој, вербата има најголема улога.

Дедо Милош за прв пат прозборел во манастирот "Св. Богородица"

Домарот на манастирот, дедо Милош, има интересна животна приказна поврзана токму за манастирот "Св. Богородица". Тој е роден во селото Кучевиште, а до својата 21 година бил нем. Откако неговата баба му кажала за манастирот, тој дошол тука и неговиот глас се пуштил и почнал да зборува, но кога си заминал од манастирот, повторно занемел. Така, тој решил да се врати во манастирот и да остане да се грижи за него. До ден-денес дедо Милош останал да живее во манастирот. Тој денес има 83 години и може да зборува. И покрај староста и изнемоштеноста, со радост ги дочекува сите кои доаѓаат во манастирот.