Ја срамите Македонија, дедо ми се борел за неа, извикал човекот кој застанал пред рачниот катапулт вчера на протестот пред Собранието додека учесниците во „Шарената револуција“ гаѓале со боја кон Законодавниот дом. Веднаш настанала мешаница, а неколку машки лица од групата го тргнале настрана. Човекот, како што може да се види од објавените снимки, не сакал да замине и инсистирал да остане за, како што велел, да го одбрани собранието од вандализирање.
Полицајците кои се поставени да го бранат собранието не реагирале на инцидентот. Човекот сепак на крај е тргнат настрана, а демонстрантите продолжиле да го гаѓаат Собранието. За вечерва е закажана и забава во организација на т.н. Шарена револуција, на улицата пред полициската станица во Центар.