На 28 јуни со почеток во 22 часот, трета година по ред, овојпат на градската плажа "Камени мост" (летен камп "Кастро"), во центарот на градот, ќе се одржи еко фестивалот "Саунд оф грин", во организација на Друштвото за управување со отпад од пакување "Пакомак", а во соработка со "Пасворд продукција". Пред скопската публика ќе настапат едни од најдобрите македонски бендови: "Суперхикс", "Паркети" и диџеј Гоце Д-Сауце.
Влезници за фестивалот нема да се продаваат, туку ќе се добиваат во замена за 3 празни пластични шишиња од која било големина. Сите што сакаат да бидат дел од оваа голема журка треба да ги донесат собраните шишиња на пултовите на Пакомак пред влезовите на градската плажа на кеј пред почетокот на концертот на 28 јуни и со тоа да си ја обезбедат својата влезница за овој несекојдневен музички настан.
"Спојот на музиката и грижата за животната средина се покажа како успешна формула за да ги поттикнеме младите на забавен начин да ја доживеат селекцијата на пластичниот отпад. Минатата година на овој фестивал имавме одличен одѕив, а оваа година во овие наши активности ни се приклучи и продуцентската куќа "Пасворд продукција", така што, очекуваме оваа година да имаме исто така одлична забава и уште посилни позитивни реакции од публиката за чисто и поубаво Скопје", изјави Ико Брдароски, менаџер за грижа за корисници во "Пакомак".
