Капелата „Свети Петар“ – мала и не премногу раскошна црква којашто се смета за најстара во швајцарскиот град Луцерн, го инсталираше Исус Христос покренат со вештачка интелигенција. Програмата, позната како „Бог во Машина“ (Deus in Machina), е инсталирана во август како најнов чекор во повеќегодишната соработка за тридимензионална реалност со тамошната Универзитетска истражувачка лабораторија. Инсталацијата зборува 100 јазици.

-Тоа беше вистински експеримент. Сакавме да видиме и да разбереме како луѓето ќе реагираат на Исус покренат со ВИ. За што би разговарале со Него? Дали би имало интерес да разговараат со Него? Веројатно сме пионери во ова, вели теологот Марко Шмид.

По проектите коишто експериментираа со виртуелна и проширена реалност, црквата одлучи дека следниот чекор е да инсталира тн. аватари.

-Дебатиравме каков аватар би бил тоа – теолог, личност или светец? Но, тогаш сфативме дека најдобра фигура ќе биде самиот Исус, рече Шмид.

По обуката на ВИ-програмата и полнењето со теолошки написи, посетителите се поканети да му поставуваат прашања на Исус (инсталацијата), со одговори прикажани на екран. Тој одговара во реално време, нудејќи одговори генерирани со ВИ.

Луѓето се советувани да не откриваат никакви лични податоци. – Тоа не е исповед. Немаме намера да имитираме признание, дообјасни Шмид.

За време на двомесечниот период на експериментот, повеќе од 1.000 луѓе – вклучувајќи и муслимани и туристи од Кина и Виетнам – ја искористија можноста да комуницираат со аватарот. По испитувањето потоа, две третини од посетителите сметаат дека тоа е духовно искуство.

-Значи, можеме да кажеме дека тие имаа „религиозно-позитивен“ момент со овој Исус покренат со ВИ. За мене, тоа беше изненадување, истакнува Шмид.

Експериментот, исто така, предизвика критики во црковната заедница. Некои католички свештеници протестираа поради употребата на исповедалницата. Протестантите, пак, е против употребата на слики на ваков начин. Шмид вели оти црквата спроведе тест со 30 луѓе пред да го постави аватарот. По почетокот на проектот, таа се погрижи поддршката за верниците секогаш да биде достапна.

-Никогаш не добивме впечаток дека (инсталацијата) зборува чудни работи. Но, се разбира, не можеме да гарантираме дека нема да каже ништо чудно, рече Шмид.

На крајот, токму оваа неизвесност го навела да одлучи дека аватарот засега ќе остане само привремен експеримент.

-Тоа е навистина едноставна и достапна алатка со којашто може да зборувате за религијата, христијанството, христијанската вера. Може да се преобрази во еден вид повеќејазичен духовен водич којшто ќе може да одговори на религиозни прашања, рече Шмид.

За свештеникот, големиот интерес што инсталацијата го предизвика, покажува дека „луѓето сакаат да одат подалеку од Библијата“, тајните и обичаите.

-Мислам дека има потреба да се разговара со Исус. Луѓето сакаат да добијат одговор, сакаат зборови. Сакаат да слушнат што Тој вели, појасни свештеното лице.

Можеби една од најубавите жени на денешнината, кубанската глумица Ана де Армас, неодамна е видена на романтична прошетка со Мануел Анидо Куеста, инаку посинок на кубанскиот претседател Мигел Дијаз-Канел Бермудез. Таа врска не наиде на одобрување кај јавноста во САД – каде што таа живее, но и во Западот, воопшто.

Имено, Кубанката е цел на критики дека „се забавува со посинокот на диктаторот“, а побегнала од Куба токму поради „таа диктатура и лошите услови за живот“, пишува „Дејли мејл“. Таа се преселила од Куба во Шпанија на 18 години и таму ја почнала својата актерска кариера, пред да замине за САД.

„Ана де Армас ја напушти Куба, за да продолжи со кариерата и животот во Америка, а на крајот заврши во врска со посинокот на кубанскиот диктатор. Ова е лошо, многу лошо“; „Овие фотографии мора да го обиколат светот, луѓето не смеат да имаат милост. Познатата актерка Ана де Армас е фотографирана во Мадрид со синот на диктаторот и негов можен наследник. Тие се пар. Уживаат во Мадрид како ништо да не се случува“ – се само дел од негативните коментари.

Поради овие забелешки, глумицата ги ограничи коментарите на својот Инстаграм.

Според критичарите, кубанскиот претседател ја продолжил доктрината на противникот на САД, Фидел Кастро, којашто не дозволува опозициски партии или протести против владејачката партија. Тој е обвинуван и за големи прекршувања на човековите права.

Мануел Анидо Куеста е адвокат и син на сопругата на кубанскиот претседател од претходниот нејзин брак. Тој му е близок советник на својот очув и често го придружува на официјални настани и патувања. Момчето на глумицата е обвинуван дека живее луксузен живот со чести патувања во странство, додека повеќето Кубанци живеат во сиромаштија.

Во Специјалниот суд во Белград денеска имаше завршни зборови на судскиот процес за масовното убиство во селата Мало Орашје и Дубона против Урош Блажиќ и неговиот татко Радиша Блажиќ, за кои обвинителството побара максимални казни, јави дописникот на МИА од Белград.

Обвинетиот Урош Блажиќ изјави дека моли да биде „најстрого казнет“, велејќи дека сака да ги „искупи гревовите“. Тој им изрази сочувство на семејствата на жртвите што ги убил таа ноќ и додаде дека би сакал да ги донира своите органи на повредените во масакрот.

Блажиќ смета дека тој лично заслужува многу полошо од зборовите кои му ги упатуваа членовите на семејството на убиените, но дека не сака да зборува за масовното убиство бидејќи, како што наведе, не може да се најде мотив за вакво злосторство.

-Немам мотив. Тоа е некој вид на пореметеност. Некое зло. Во тој момент како да не бев јас таа личност, изјави Урош Блажиќ.

Одговарајќи на прашањата на Небојша Перовиќ, полномошникот на оштетените, Блажиќ рече дека бил револтиран кога го видел злосторството во ОУ „Владислав Рибникар“, додека само еден ден подоцна самиот уби девет, а повреди 12 лица.

Вишото јавно обвинителство во Смедерево му предложи на судот Урош Блажиќ, обвинет за масовни убиства во селата Мало Орашје и Дубона, да биде осуден на максимална затворска казна, а неговиот татко Радиша на 20 години затвор.

Со оглед на тоа што Блажиќ за време на делото сè уште немал 21 година, максималната затворска казна на која според законот може да биде осуден е 20 години.

Обвинителството предложи таткото на првообвинетиот Радиша Блажиќ да биде осуден на 20 години, бидејќи според ставот на Обвинителството создал услови за ова кривично дело, иако не пукал од пиштолот.

Главниот обвинител на Вишото јавно обвинителство во Смедерево, Иван Конатар, изјави дека одбраната на Урош Блажиќ е неприфатлива и е навреда за семејствата на жртвите.

Конатар нагласи дека злосторството е резултат на размислувањето на Блажиќ, како и дека тој ладнокрвно донел одлука, за што, меѓу другото, покажува и тоа што вежбал пукање во подрум и го најавил делото кога испратил порака до пријател.

На сите им е ускратен одговорот на прашањето зошто го направил тоа, рече Конатар и изјави дека Блажиќ нема искрено каење и сочувство, туку дека неговата одбрана има за цел само да го ослободи татко му од обвинението дека му набавил и дал оружје.

Конатар истакна дека сите изведени докази потврдуваат дека Блажиќ извршил кривични дела тешко убиство, недозволено носење оружје, неовластено користење туѓо возило и киднапирање. Обвинителот додаде дека Блажиќ бил свесен за делото што го направил и за последиците кои настанале.

Конатар истакна дека нема олеснителни околности на страната на Урош Блажиќ и му предложи на судот на Урош и Радиша Блажиќ да им се одреди притвор.

-Радиша Блажиќ имал афинитет кон оружјето, кое несомнено го пренел на својот син, рече Конатар и нагласи дека никој немал пристап до куќата во која било пронајдено оружјето, како и да никој друг, освен Радиша Блажиќ, тоа оружје, муниција и експлозиви ги внесол во куќата, бидејќи тоа е „типично воено оружје“.

Блажиќ е во притвор од апсењето, а Урош Блажиќ од 5 мај минатата година. Урош Блажиќ ја признал вината, а неговиот татко негирал дека го набавил оружјето со кое го извршило делото и другото оружје кое било пронајдено во нивната куќа по злосторството.

Урош Блажиќ е обвинет дека убил девет и ранил 12 лица.