Фленсбург повторно е пред голем предизвик на кој екипата не успева да одговори трипати во својата историја, и да го мине четвртфиналниот двомеч, откако во ракометната Лига на шампиони е воведен завршниот турнир во Келн. Вардар одигра стабилно, цврсто и има одличен резултат пред реваншот во Скопје.Чудесниот голман Петар Ангелов просто ги маѓепса ракометарите на Фленсбург, пишуваат германските медиуми.

Во статијата на реномираниот „Кикер“, популарниот Диви доби заслужени комплименти за серијалот неверојатни одбрани, а новинарите го истакнаа и извонредниот учинок на Игор Карачиќ, кој беше најефикасен на мечот со 9 гола.

„Македонската ракометна сензација го урна Хамбург, а и во Фленс арената беше рамноправен противник. Ангелов беше несовладлив, а Фленсбург повторно стравува. Проклетството од 2009, 2011 и од 2013 година кога тимот не успеа да ја мине четвртфиналната фаза повторно се наѕира. Победата е со мала разлика и не е воопшто гаранција за пат во Келн на завршниот турнир за титулата“, стои во текстот на „Кикер“ посветен на првиот четвртфинален дуел меѓу Фленсбург и Вардар, што заврши со резултат 24-22 за Германците.