Тајната на монашкиот локум произведен во македонски манастир

Тројца монаси од манастирот “Света Богородица” пишуваат нова историја за Берово. Градот на југоистокот од Македонија кој никогаш не произведувал локум, сега го прави највкусниот и најнеобичен локум. Отец Фотиј, монахот за кого велат дека е мозокот за локумот, неодамна направи револуционерен чекор во локумопроизводството – го направи првиот чоколаден локум. Не прелиен со чоколадо, туку направен од чоколадо.

Познавачите велат дека таков не се прави ниту во Турција, земјата што важи за изумител на оваа слатка.

Монасите го прават локумот веќе една и пол година, но приказната почнала многу поодамна.

“Уште кога дојдовме овде, во 2002 година, почнавме да внесуваме промени. Со нашето настанување тука, ‘Света Богородица’ од црква стана манастир. Приближно во истиот период почнавме да произведуваме парфимиран темјан, а подоцна и сапун. Ги произведуваме и денес, но постојано баравме нешто ново што можеме тука да го произведеме. Јас сум слаткар по професија, па идејата за локумот се појави некако спонтано. На Света Гора, секој посетител го послужуваат со локум и со една чашка ракија, да се окрепи пред да си оди, а ние баравме нешто што ќе биде ем автентично ем ќе има учинок, економија за манастирот. Ни самиот не знам во кој момент решив да почнам да се обидувам да направам локум, а откако дојдов до успешна формула, почнав да експериментирам со вкусовите, аромите. Така експериментирајќи, дојдов до сегашниот чоколаден локум”, вели отец Фотиј, кој со денови се обидувал да ја пронајде вистинската густина за чоколадниот локум.

Рецептот за локумот и не е тајна. Се прави по истиот рецепт по кој се прави и крушевскиот локум од шеќер, вода и од скроб, но тајната е во дозирањето. Отец Фотиј вели дека треба да си мајстор, искусен во готвењето, за да ги погодиш вистинската доза и вистинското време на варење за локумот да излезе онаков каков што треба.

“Иако е по истиот рецепт како крушевскиот, нашиот локум е сосема поинаков. Го валаме во кокос место во шеќер во прав, но се разликува и во мирисот и во вкусот. Не се лепи за забите, што ни беше исклучително важно и останува мек и кога е отстојан. Не беше лесно да дојдеме до точната формула. Пред да почнеме да правиме локум, марифетот ни го покажаа мајсторите во ‘Донија’. Еден мајстор ни помагаше и овде во првите денови, а потоа голем советник за сe што ќе ни требаше ни беа Интернетот и Јутјуб. И сега постојано се советуваме”, се пошегува отец Фотиј.

Тој, заедно со отец Онуфри, го подготвува локумот, а отец Исак им е логистика, ги завршува сите останати обврски за манастирот да функционира. Една од нив во студеното Берово е одржувањето на огнот. Во работилницата за локум, отец Фотиј особено внимава на температурата и на влажноста на воздухот, а хигиената е на ниво на лабораторија за лекови. Се влегува со посебни папучи, а на секој посетител отец Фотиј му става заштитна капа на главата. Бидејќи прават локум со сите видови овошје и јаткасти плодови што ги нуди Малешевијата, во работилницата имаат мал склад каде што, уредно спакувани, чуваат мелени калинки, мандарини, киви, лимони, ананас, вишни, кајсии, шумски јагоди…

Колку видови овошје имаат, толку видови локум прават, а на некои им додаваат и јаткасти плови.

“На локумот од роза му ставаме и орев. Розата има силен мирис, но и покрај тоа, откако ќе се изеде локумот, во устата останува вкусот на орев. Тоа ни беше целта кога одлучивме да правиме и локум со роза. Во оној од калинки, пак, или во оној од капини има ситни семчиња оти плодовите се мелени. Експериментирањето ни покажа дека ако ги ставиме цели, плодовите се сушат, па се добива локум со стуткано овошје. Затоа сe што ставаме е мелено. Правиме и мрсен локум, со шам од јајца. Сите останати се посни, вклучително и чоколадниот, во кој ставаме посно чоколадо”, вели отец Фотиј.

Експериментирањето нема да заврши со чоколадниот локум. Тој е само последен од монашката работилница. Англиско тофи им е следниот предизвик. Планираат и проширување на производството. Плановите на отец Фотиј се истиот локум да се прави и во Скопје.

“Сакаме да отвориме работилница и во Скопје. Во неа ќе вработиме луѓе што се без работа, а помагаат во манастирите. Така ќе ги згрижиме. Сакаме тоа да биде работилница, а ние овде да бидеме лабораторија, да пронаоѓаме нови вкусови, да правиме нови производи”, вели отец Фотиј.

И во новата работилница сe ќе се прави рачно, оти отец Фотиј вели дека тоа го прави овој локум поразличен и повкусен од оние што фабрички се произведуваат.

“Секое парче локум е префатено од нас. Откако ќе се свари, локумот рачно се сече, се вала во кокос и едно по едно локумче се става во кутии од по половина килограм.

Понекогаш на помош за пакување ни доаѓаат деца. На тоа сме особено горди. Тоа го прават самоиницијативно”, вели отец Фотиј.

Монашкиот локум засега е привилегија за малкумина. Не го продаваат по дуќани, а не е изложен никаде, дури и во манастирот. Го купуваат само пријатели на монасите и пријатели на нивните пријатели. Може да се купи и во манастирите во Вељуса и во скопско Љубанци и никаде на друго место. Отец Фотиј вели дека нивниот локум сам се продава, не му е потребна реклама. Сега произведуваат по 120 кутии неделно оти, покрај локумот, тројцата монаси имаат и други дневни обврски. Се надеваат дека наскоро ќе успеат да отворат работилница и во Скопје, што ќе го зголеми производството. Тоа ќе им донесе поголем буџет, кој, пак, за нив ќе значи поголеми можности за експерименти и за создавање нови производи.

Слично како на Света Гора, монасите нe испратија со локум и се вратија во работилницата да го довршат пакувањето на чоколадниот локум, кој специјално го подготвија за да ни го покажат како го прават.

Извор: Религија.мк

Дуално образование во партнерство со бизнисот за да се исполнат потребите

Педесеттина научни трудови ќе бидат претставени на Втората меѓународна конференција на тема “Бизнис образование во 21 век ” што во организација на Факултетот за бизнис и економија се одржа денеска во Ректоратот на Универзитетот на Југоисточна Европа во Тетово.

Според членот на МАНУ и професор на УЈИЕ Абдулменаф Беџети тоа што е светска карактеристика е се поголемиот јаз помеѓу потребите на бизнисот и кадрите што излегуваат од универзитетите.

– Пазарот на трудот по својата природа е склон на побрз развој поради претприемништвото и употребата на иновациите, додека универзитетите по дефиниција се конзервативни институции. Ние мораме да се организираме за да го стесниме овој јаз и да се прилагодиме не само со студиските програми, туку и со начинот на пренесување на знаењето кон студентите. Светските податоци покажуваат дека има 20 отсто таканаречени дислексиќни студенти кои сакаат да учат, но не сакаат да читаат така што студиските програми веќе се прилагодуваат за соодветно пренесување на знаењето и за оваа категорија, рече Беџети.

Заменик министерот за образование Арбр Адеми посочи дека и Владата и Министерството за образование напорно работат да се унапреди образовниот систем за од него да излегуваат такви кадри со знаења што ќе одговараат на потребите на пазарот на трудот.

– Согласно Стратегијата за образование ние сакаме да го спроведеме концептот на дуално образование, односно образовниот процес да се спроведува во директно партнерство со потребите и кај бизнис заедницата, изјави Адеми.

Министерот за економија Крешник Бектеши рече дека Владата се обидува преку повеќе мерки и програми да ги поддржи иницијативите на младите и дипломираните студенти за покренување сопствен креативен и иновативен бизнис преку третиот столб за економска подршка на мали и средни претпријатија за што се наменети околу 11 милиони евра.

Сопственикот на компанијата „Даути Комерц“, Џемаил Даути како позитивен пример од својата соработка со УЈИЕ го посочи податокот дека освен целосното финасирање на дел од студентите за време на нивното студирање согласно потребите на неговата компанија во поглед на логистиката и продажбата на стоки за широка потрошувачка и нивните кадри за водење на финансиите и комерцијалистите доаѓаат од редот на завршените студенти на УЈИЕ.

Според организаторите научните работници доаѓаат од Македонија, Албанија, Косово, САД, Украина, Португалија, Литванија, Грузија, Белорусија и други земји.

Земји-членки на ЕУ ставија рампа за датум за Македонија и Албанија

Земји-членки на ЕУ испратија допис Советот преку кои бараат на МАкедонија и Албанија евентуално да им се додели Датум за преговори на пролет но следната година, објави Макфакс, објавувајќи „нон пејпер“ документи од Брисел.

Документот циркулира меѓу оние кои се против почетокот на преговорите во јуни, иако еврокомесарот Јоханес Хан го потенцираше овој месец како датум за отпочнување на преговорите.

„ За ПЈРМ, и покрај вистинските промени во општата атмосфера во земјата, извештајот не покажува јасен суштински напредок во спроведувањето на Итните реформски приоритети. Имплементацијата на новите судски реформи е “тукушто започната“ и треба долгорочен напредок и континуирана промена во однесувањето. Неопходни се повеќе напори за да се обезбеди регрутација врз основа на заслуги и деполитицизација на јавната администрација (“заробена држава“). Борбата против корупцијата и организираниот криминал се уште не даде задоволувачки резултати: и покрај поставената правна и институционалната рамка, корупцијата преовладува во многу области и продолжува да биде сериозен проблем, додека пак капацитетот на институциите за ефективно да се справат со корупцијата има покажано структурни и оперативни недостатоци, меѓу кои е и политичкото мешање“, пишува меѓу другото во негативната препорака.

Тие аргументираат дека Унијата мора да стане поцврста пред да стане поголема. Се наведува дека ЕУ во моментов минувала низ една доста чувствителна фаза на реформи.

„ Во овој контекст, сметаме дека условите за отворање на пристапните преговори со Албанија и ПЈРМ не се исполнети“, сметаат тие.

За опструкциите на извесни земји членки на унијата наговести и премиерот Зоран Заев на телевизискиот дуел, кога отворено кажа дека поддршка немаме од Франција и Холандија.

Серија на потреси во Охридско-преспанскиот регион

Телеметриската сеизмолошка мрежа на Република Македонија, со станици во Скопје, Валандово, Охрид, Штип и Пехчево, одржувана од Сеизмолошката опсерваторија при Природно-математичкиот факултет во Скопје, ноќва на 26.5.2018 година регистрирше серија на земјотреси чии епицентри се наоѓаат на 85 km југозапагно од Скопје и потекнуват од епицентрално подрачје Дебарца.

Два од овие земјотреси, и тоа во 0 часот и 50 минути и во 0 часот и 59 минути беа со Рихтерова магнитуда од 3.0 и беа почувствувани од населението во селата на Плакенска Планина со интензитет од IV степени според Европската макросеизмичка скала. А во Охрид, Струга и Кичево со интензитет од III стрпени според истата скала.

Популарно