Македонија увезувала стотици илјади тони опасен отпад секоја година!

Само во 2016 година Република Македонија увезла 118.778, а извезла само 4.011 тони отпад, стои во официјалниот извештај на Министерството за животна средина. Овие бројки се добиени врз основа на годишниот рапорт на создавачите на опасен отпад, кои се должни да пријават колку отпад извезле, а колку увезле.

„Овие количини создаден отпад во споредба со количините од претходните години се многу помали, што се должи на непријавување создаден опасен отпад од страна на АД ЕЛЕМ, подружница РЕК „Битола“, кое прикажало во претходните години создаден опасен отпад кој сопствено го отстранува во количина од околу 1.500.000 тони“, се наведува во извештајот на Министерството.

Под опасен отпад се смета и медицинскиот што се создава во здравствените институции како производ на употребени средства и материјали при дијагностицирање, лекување, третман и превенција на болестите кај луѓето и кај животните. Во истата категорија се и патолошкиот отпад, што содржи отфрлени делови од човечко тело, инфективниот кој содржи патогени биолошки агенси кои поради својот тип може да предизвика болести кај луѓето кои се изложени, отпад од остри предмети што содржи игли, ланцети и скалпели, како и фармацевтскиот отпад што содржи фармацевтски производи, цитостатични лекови и цитостатици вратени од одделот каде што биле излеани и хемиски што содржи отфрлени цврсти, течни или гасовити хемикалии.

Од Министерството за животна средина,сепак, вчера соопштија дека од 2013 до 2017 година не е регистриран увоз на медицински отпад во земјава како одговор на реакциите во јавноста по енормното загадување на воздухот и обвинувањата дека согорувањето медицински отпад во „Дрисла“ е виновник за тоа.

Синот на Мисовски: Хитсеријата на јавноста ме натера да направам штетен потег за себе

По огромниот број на вработувања во семесјтвата на владејачката коалиција во јавни институции, реакциите во јавноста натераа досега двајца од нив да се повлечат од работната позиција. Еден е синот на пратеникот Мисовски, кој тоа го објави на ФБ:

- Драги пријатели и непријатели, во изминатите неколку дена јас и мојата фамилија бевме мета на јавни прозивки упатени во врска со моето вработување во АСО. Со чиста совест тврдам дека сите критериуми кои беа поставени во јавниот оглас (повторувам јавниот оглас) за времено вработување во АСО на 12 месеци како соработник за супервизија на осигурување, во потполност ги исполнувам. Бев повикан на интервју, а бидејќи немаше други пријавени кандидати (потенцирам) на јавниот оглас за вработување, како единствен пријаен кандидат кој ги исполнува условите за временото вработување на 12 месеци бев вработен. Иако знам дека нема ништо спорно во врска со моето вработување во смисла на прекршување на каква било процедура за вработување, сепак чувствувајќи морална одговорност и под голем притисок на јавноста одлучив да поднесам отказ на работното место. Се надевам дека сега барем дел од јавноста ќе може малку да здивне и да почувствува барем мало задоволство бидејќи успеа преку притисок и хистерија да натера некој човек во државава да повлече потег штетен за себе покажувајќи интегритет и дигнитет.

Извор: Фејсбук статус Кристијан Мисовски

Сопругата на директорот на ЕЛЕМ стана шефица на кабинет во Централен регистар

Александра Миновска, сопруга на директорот на ЕЛЕМ, Драган Миновски од октомври минатата година е вработена како шефица на кабинет кај директорката на Централен регистар, Марија Бошковска – Јанковски, пишува „А1он“.

Вработувањето на Миновска доаѓа една година откако нејзиниот сопруг е именуван за директор на ЕЛЕМ, а два месеци откако Бошковска-Јанковски седна на директорското столче во Централен регистар.

Директорката Бошковска – Јанковски ја потврди информацијата за „А1он“ и додава дека Миновска била избрана на јавен конкурс. Во врска со низата вработувања во Централен регистар на семејствата од функционерите, вели дека се е регуларно и по пат на јавен оглас. Таа ги демантира пишувањата на социјалните мрежи дека во Централниот регистар се вработени 70 лица кои се партиски кадри на СДСМ, ДУИ и НСДП.

Братучедот на градоначалникот Наумовски доби работа во „Централен регистар“

Мирослав Наумоски, прв братучед на градоначалникот на Ѓорче Петров, Александар Наумоски, пред 2 месеци бил вработен во Централен регистар на определено време. Двајцата живеат во иста куќа, во скопската населба Даме Груев.

Градоначалникот Наумоски тврди дека немал никаков влијание за неговиот братучед да биде вработен, а запрашан на која работна позиција е поставен, тој вели: „Не знам. Не сме се виделе одамна, поради обврските“. Претходно, во периодот 2004-2005 година и градоначалникот Александар Наумоски работеше во Централниот регистар.

„Не сум имал никако влијание. Како можам јас да влијаам? Тој е дипломиран, а таа е професионална установа каде треба квалификации. Тој има 7-8 години искуство. Централен регистар е професионална установа каде се потребни квалифакации“, вели Александар Наумоски за .

Од Централниот регистар не одговорија на прашањата дали Мирослав Наумоски ги исполнувал критериумите, на која работна позиција е распределен, на кој оглас се пријавил и како од сите кандидати токму тој е избран на позицијата.

На „фејсбук“ профилот од сега вработениот Мирослав Наумоски можат да се видат низа од фотографии каде тој се појавувал на партиски активности организирани од СДСМ, а учествувал и во предизборната кампања на неговиот братучед Александар Наумоски. Во периодот од 2009-2013 година тој бил советник на СДСМ во Општина Ѓорче Петров.

Антикорупциската комисија минатата недела ги објави случаите кои ќе бидат отворени за вработувањата на децата и роднините на актуелни функционери во државниот сектор, а премиерот Зоран Заев најави дека веќе дел од нив му потврдиле оти нивните блиски ќе се откажат од работните места.

Денеска, портпаролот на СДСМ, Костадин Костадинов, изјави дека неговата мајка се повлекува од работното место во Централниот регистар во Струмица, но дека станува збор само за „морален чин“.

Популарно