Видео:Стевчо Јакимовски чека притвор?

Стевчо Јакимовски поранешниот градоначалник на Карпош и лидер на Гром  е осомничен дека во периодот од 2011 до 2017 година им овозможил на три фирми и на едно физичко лице да се стекнат со  градежно земјиште кое било во државна сопственост, со откуп по цени далеку пониски од пазарните, со што го оштетил буџетот на државата за повеќе стотици илјади евра.

Според обвинителството станува збор за земјиште на Илинденска, кое подоцна било препродадено неколкукратно поскапо на градежни компании кои таму сега градат згради.

Според МВР, на ваков начин фирмата „Гром промет“ приватизирала државно земјиште со вкупна површина од 1533 метри квадратни, кое имало вредност од околу 450.000 евра.

Фирмата „Емаг“, слично стекнала 722 метри квадратни, вредни околу 211.000 евра.

На „Дот мебел“ и на лицето Т.К., пак, им е овозможено да се стекнат со ексклузивно право на откуп на земјиште во висина од 450 денари од м2, додека на јавно надавање метар квадратен од оваа парцела би се продавал со почетна цена од 300 евра.

Поради овие сомненија, поднесени се кривични пријави против вкупно деветимина - екс градоначалникот на Карпош, тројцата управители на фирмите, едно физичко лице, како и четворица вработени во општината во секторите за урбанизам и експропријација на земјиште.

Освен оваа, јавното обвинителство против Јакимовски води истраги и за уште три други случаи.

Го сомничи дека во 2015 година спровел јавна набавка за обнова на цветен расад на жардиниери, што било во надлежност на Град Скопје, потоа дека во 2016-та донел одлука за јавна набавка за изградба на плоштад на локација каде била предвидена сообраќајница, а проширена е истрагата започната за три тендери во август лани, со сомневање за бесправно градење.

Силјановска: Ќе ви снема политичари од опозицијата за апсење

Професорката и претседателски кандидат, Гордана Силјановска, го коментира апсењето на поранешниот градоначалник на Општина Карпош, Стевчо Јакимовски.

„Како тргнавте со апсењата ќе нема политичари во опозиција…па од Ципрас ќе барате да ви прати“, пишува Силјановска на Твитер.

Јакимовски утринава беше уапсен заедно со уште неколку лица, поради истрага на Обвинитеслтвото за организиран криминал. Се сомничи за злоупотреба на службената положба и проневера на над еден милион евра.

Мицкоски за апсењето на Јакимовски: Доаѓа правда за сите

Апсењето на лидер на опозициска партија на еден месец пред гласањето на претседателските избори не е ништо друго освен чин на брутален политички притисок и израз на огромен страв и паника на заевизмот кој губи, пишува лидерот на ВМРО-ДПМНЕ, Христијан Мицкоски, во фејсбук-објава, а во врска со денешното апсење на Стевчо Јакимовски.

„Тоа што досега нема ниту една акција против криминал за било кој човек од оваа власт, а сепак ние остануваме држава заробена во корупција на дното во Европа покажува дека е криминална и варварска власта. Очигледно кампањата на заевизмот се апсења, но во исто време тоа покажува и дека Заев драматично губи кај народот“, наведува Мицкоски во објавата.

На крајот од својот статус, партискиот лидер порачува: „Не можете вие толку да уапсите колку што ние ќе ве победиме. Доаѓа правда за сите“.

Популарно