Наградата за интернационален успех во областа на филмот на овогодишното 23то издание на Златна бубамара на популарноста го доби македонскиот кандидат за оскар Медена земја, а наградата на сцената ја подигнаа дел од екипата која работеше на филмот како и двете семејства за кои се зборува во филмот.

Преполната сала со стоечки пет минутни овации и аплауз ги дочека на сцената Атиџе Муратова, Љутвие со дел од децата како и режисерката Тамара Котевска и Фејми Даут.

Како што истакна и режисерката тие не стигнаа да го освојат оскарот во Холивуд, но оваа награда им значи дури и повеќе, па решија наградата да ја примат онака како што мислеле тоа да го направат во Долби театарот во Холивуд – со песна изведена од насмеаната Атиџе.