Грчката влада на Еврогрупата ѝ го предаде пакетот-мерки, со кои им излезе во пресрет на барањата на меѓународните кредитори да ги зголеми даноците и да го намали државниот трошок за пензии.

За возврат Грција од кредиторите очекува 53,5 милијарди евра со кои до крајот на јуни 2018 година  ќе ги покрие доспеаните обврски за отплата на долговите, пишува Ројтерс.

Тие мерки, кои вклучуваат зголемување на даноците за бродските компании и укинување на даночните олеснувања за островите треба да ги исполнат условите за новиот договор со кредиторите кој би ја спасил Грција од банкрот и од излез од евро-зоната. Владата исто така планира да го зголеми данокот на додадена вредност за рестораните и хотелите, да започне реформа на пензискиот систем и да одреди цврст рок за започнување на големите приватизации.

АП констатира дека грчката влада ги прифатила барањата кои претходно ги одбиваше, главно со преместување на разни категории стоки и услуги во повисока даночна стапка.

Ројтерс прецизира дека меѓу понудените мерки се веднаш да се зголеми данокот на луксуз и воведување на данок на телевизиски реклами и премин на нов систем на колективно преговарање кон крајот на годината.

Грчката влада, исто така, се обврзува до крајот на октомври да ги објави датумите кога ќе распише тендери за приватизација на железниците и пристаништата во Пиреја и Солун.

Исто така, ќе преземе чекори за приватизација на регионалните аеродроми и за продажба на државните акции во грчкиот Телеком. Освен тоа, Атина нуди и кастрење на трошоците за одбрана.

Владата, исто така за октомври, ја најави и новата реформа на пензискиот фонд. Грчкиот предлог пристигна во Брисел и му беше предаден на шефот на Еврогрупата, Јерн Дајселблум, речиси два часа пред истекот на рокот - четврток на полноќ. Ако европските партнери бидат задоволни, пакетот-мерки на Ципрас би можело да биде прифатен на вонредниот самит на лидерите на ЕУ в недела, а во спротивно на Грција ѝ се заканува излез од евро-зоната, јавува Ројтерс.