Маџари и Сингелиќ ќе добијат велосипедска патека до Центар, велосипедистите го бараат истото и за Чаир

Скопските населби Маџари и Сингелиќ ќе добијат велосипедско поврзување со централното градско подрачје во рамките на тековната реконструкција на булеварот Александар Македонски. Градот Скопје за прв пат ќе врши експропријација на земјиште за да се изгради велосипедска патека по овој булевар, преку која граѓаните од овие две населби ќе можат да патуваат со велосипед до центарот на Скопје. Станува збор за продолжување на велосипедската рута 1 од проектот „Скопје велоград“, која во моментов е изградена на потегот од населбата Автокоманда до Карпош, пишува meta.mk 

Од граѓанската иницијатива „На Точак“ ја поздравуваат ваквата одлука на градските власти, но и посочуваат дека ова треба да прерасне во редовна пракса при изградбата и реконструкцијата на улиците во градот. Тие деновиве испратиле и допис до Град Скопје во однос на најавата за одложување на изработката на проектната документација за тунелот под Скопското Кале, со чија што изградба општините Чаир, Бутел и Шуто Оризари преку Пластичарската улица треба да се поврзат со нова сообраќајница со центарот на Скопје.

Од „На Точак“ во дописот велат дека ако навистина има потреба од изградба на новата сообраќајница, која што треба да се поврзе кај Владата со булеварите „Св.Климент Охридски“ и „Илинден“, тогаш задолжително да се обезбеди безбеден пешачки и велосипедски сообраќај по неа. Тие бараат намалување на планираната ширина на коловозните ленти од 3,5 на 3 метри, тротоари со ширина од минимум 3 метри и велосипедски патеки од по 2,5 метри во двата правци на идната сообраќајница. Ако нема услови за вакво нешто, тогаш тие бараат да се изгради посебен пешачко-велосипедски мост и тунел за да можат граѓаните на овие општини поедноставно да стигнат до центарот на Скопје.

„Оваа врска по Климент Охридски ќе биде многу, многу атрактивна за пешачење и користење точак, за скратување дистанци меѓу Чаир и Центар, сакале или не. И ако не обезбедите специјален простор за нив, луѓето ќе го користат коловозот, ќе пречат на автомобилите, а и ќе ГИНАТ. Со најавените димензии, овој вијадукт ќе донесе пребрз сообраќај (околу 100 km/h) до Илинденска во срцето на Градот и ќе ја загрози безбедноста и амбиентот на живеење во најстрогиот центар. Поради сето наведено, бараме да се ревидира тендерската документација“, се вели во дописот испратен од „На Точак“ до Град Скопје.

Од „На Точак“ забележуваат дека токму граѓаните на Чаир и Бутел немаат ниту една велосипедска врска со центарот на Скопје, а треба да ги имаат и по улицата Цветан Димов и по идната сообраќајница што ќе се гради.

Инаку, „Мета.мк“ во изминатово лето пишуваше за конкретни предлози за развој на велосипедскиот сообраќај, вклучувајќи го и прашањето за изградба на нови патеки за движење на велосипедистите до периферните населби во Скопје.

Карпош смрди на чад - дивата депонија кај салата „Борис Трајковски“ и денеска не труе

И денеска Карпош смрди на чад. Дивата депонија покрај кејот на реката Вардар во Скопје, во близина на салата „Борис Трајковски“, гори и понатаму иако пламен нема. Непријатна миризба се чувствува низ целата општина па до Центар. Од Пожарната велат дека брзо ќе го локализираат пожарот, но дека поради ветрот чадот се шири низ населбата.

На мирис на чад се жалат граѓани секоја вечер откако пред три дена беше запалена депонијата, но надлежните велеа дека немаат пријава.

Истата депонија беше запалена во април 2019, а од март годинава почнаа градежните работи за изградба на парк на на површина од 60.000 метри квадратни. Покрај зеленило и дрвја, ќе биде изведена и ботаничка градина, како и содржини за спорт и рекреација.

Градоначалникот на Општина Карпош Стефан Богоев на 14 септември, кога почнаа пожарите на депонијата, кажа дека не може да се излезе на крај со граѓаните.

„Влезот во близина на аква паркот од каде влегуваа камиони го затворивме откако ја исчистивме депонијата, но сега си направиле друг пат и од таму влегуваат и прават депонии. Сто пати чистевме, стававме препреки, но џабе, пак се прават депонии.  Депонии се прават и во Карпош 4, во делот кој го расчистува и рамни земјиштето за новиот парк“, вели градоначалникот Богоев.

Богоев вели дека инспекторите од Општината постојано биле на терен, но граѓани истураат камиони со шут и  во 5 часот наутро во недела.

Доколку користите јавен превоз ова треба да го знаете: ЈСП со важна информација за возниот ред

ЈСП ќе продолжи да вози по саботен возен ред затоа што има многу мал број патници кои го користат јавниот градски превоз. Зголемена фрекфенција на патници, вели градоначалникот на Град Скопје Петре Шилегов, има само во перодите кога се оди на работа и тоа само на одредени линии. Тоа, појснува тој, се решава со зголемување на бројот на автобуси во тој период на денот.

– Возниот ред е саботен заради малиот број патници кои се превезуваат во текот на целиот ден и ги користат услугите на ЈСП. Само на неколку линии има зголемена фрекфенција на граѓаните и тоа само во утринските периоди кога одат на работа кога го зголемуваме бројот на автобуси на дневна основа. Заради пандемијата во одредени периоди имавме и дневна загуба од 55 илјади евра на целокупниот автобуски систем на транспортниот систем на Град Скопје. Во моментов и со вака редуциран возен ред правиме дневна загуба од околу 32 илјади евра. Мора да водиме сметка и за материјалната состојба на ЈСП, но и за Буџетот на Град Скопје, бидејќи од таму се префрлаат средства за загубите на ЈСП, рече Шилегов.

Тој вели дека во наредниот период ќе се види дали ќе продолжи слабата фрекфенција на патници или таа ќе се зголеми, по што ќе се бара оптимално решение кое, како што рече, ќе биде пред се во интерес на здравјето на граѓаните. Во моментов, рече Шилегов, може да се види дека во текот на денот не се користат автобусите со интензитет со кој порано се користеа.

Градоначалникот појаснува дека за повеќе од 40 милиони денари е падната продажбата на автобуските билети, што, како што вели, мора да се има превид.

– Нашите анализи покажуваат дека дневно на изминат километар во системот на јавниот транспорт на Град Скопје се превезуваат само 0,6 патници, а автобуска линија согласно договорите се укинува ако има помалку од 2,5 превезени патници по еден километар. Значи ние свесно со четири пати помалку превезени патници ги одржуваме линиите, затоа што нам здравјето на граѓаните ни е пред се, реше Шилегов, одговарајќи на новинарско прашање на заедничката прес-конференцијата што ја одржа со градоначалникот на Аеродром, Златко Марин.

Популарно