Бродовите во Вардар, освен како ресторани, ќе можат да работат и во други дејности. Дали ќе служат и како хотели, дискотеки, можеби ќе им се дозволи отворање киносала, фитнес-центар или нешто трето, од Град Скопје не кажуваат. Надлежните вчера не беа во можност да појаснат што е тоа што дополнително ќе им се дозволи да го работат сопствениците на бродовите во поставената урбана опрема, пренесува Утрински.

„Со предложената одлука, во урбаната опрема поставена на кејот на реката Вардар, покрај вршењето угостителска дејност на кејот на реката Вардар се предвидува и вршење на друга дејност, односно дејности. Имајќи го предвид временскиот период за кој е доделено правото на поставување урбана опрема на кејот на Вардар, а со цел да не се ограничуваат субјектите на кои им е доделено правото за поставување урбана опрема за вршење на само една дејност, Советот на Град Скопје со предложената одлука овозможува да се вршат и други дејности“, стои во предлог-одлуката за која гласаа градските советници.