Активистот се обидуваше да ѝ објасни дека тоа што го прави не е за да ја прикажува јавно, туку за да укаже на проблемите со кои се соочуваат голем дел од сиромашните граѓани. Сепак, објаснувањата не вродија со плод, жената продолжи да го удира.

Иван Пернар, хрватски активист, пратеник и лидер на движењето Жив ѕид, доби ќотек од разлутена жена додека снимаше колона луѓе кои чекаа во ред за да влезат во загребската Народна кујна, каде за сиромашните се доделува евтина готвена храна.

Пернар ја правеше снимката за да укаже дека и во Хрватска се гладува, како и дека храната во народните кујни е повеќекратно поскапа од храната што ја плаќаат пратениците во кантината на хрватското собрание.

Сепак, една жена, која се појави како од никаде, му влепи шлаканица на младиот активист и почна бесно да се пресметува со него. Пернар се обидуваше да ѝ објасни дека тоа што го прави не е за да ја прикажува јавно, туку за да укаже на проблемите со кои се соочуваат голем дел од сиромашните граѓани на Хрватска.

Неговите објаснувања не вродија со плод. Жената продолжи да го удира, по што активистот ја прекина снимката. Никој од присутните не се обиде да му помогне, но и никој не ѝ се придружи на жената.

Пернар укажува дека социјалната помош од 800 куни (105 евра) е далеку од доволна за преживување во Хрватска.