Порталот Инфомакс.мк, денска објави информација дека обвинетиот Сашо Мијалков го добил назад својот пасош.

„Во текот на вчерашниот ден, додека се подготвуваше седницата на Централниот комитет на ВМРО – ДПМНЕ и обидот на Мијалков за смена на актуелниот претседател, Мицкоски, СЈО го “награди” обвинетиот со враќање на патната исправа.

Имено по објавата на истражните постапки од страна на СЈО и Катица Јанева, на Сашо Мијалков, поранешен директор на Управата за безбедност и контраразузнавање како времена мерка за претпазливост, на барање на СЈО, Кривичниот Суд Скопје му ја одзеде патната исправа – пасош како мерка за безбедност.

Вчера низ т.н. независна, законска и проевропска, ЕУ интегративна процедура со одобрение на СЈО и Јанева, судот му го вратил пасошот на Сашо Мијалков.

Во образложението стои дека патната исправа му треба за да комуницира со странство како стопанственик и дека тоа нема да влијае врз редовното присуство на рочиштата.

Судот по консултации со СЈО и Јанева ја прифатил “променетата” позиција кон обвинетиот.

Сашо Мијалков е прво осомничен во целокупниот процес на нелегално прислушкување разговори поради кој и се формираше СЈО а и поради кој падна владата на Никола Груевски.“

Од СЈО ја негираат оваа информација: 

„Специјалното јавно обвинителство (СЈО) нема дадено согласност за враќање на пасошот на Сашо Мијалков , информираат за МИА од СЈО.

Претходно и од Основниот суд Скопје 1 за МИА потврдија дека Кривичниот совет при Основниот суд Скопје 1 не постапувал по барање за укинување на мерката за претпазливост на Сашо Мијалков.

– Во однос на информациите поврзани со лицето С.М обвинето во повеќе предмети на СЈО од Основниот суд Скопје 1  информираме дека Кривичниот совет при овој суд воопшто не постапувал по барање за укинување на мерката за претпазливост на посоченото лице и оти информациите пуштени во јавност се апсолутно неточни, појаснуваат за МИА од Основниот суд Скоје 1.

Инаку, некои од медиумите објавија дека на поранешниот директор на контраразузнавањето Мијалков му е вратен пасошот.“