Од вечерва ОГРОМНО поскапување на бензинот и нафтата

Бензините и екстра лесното масло за домаќинство од ноќеска на полноќ поскапуваат за 2,5 денари за литар, а цената на дизелот се зголемува за три денари, објави денеска Регулаторната комисија за енергетика.

Согласно новата одлука на Регулаторната комисија за енергетика, ЕУРОСУПЕР БС-95 ќе се продава по цена од 64,50 ден, ЕУРОСУПЕР БС-98 за 66,50 ден, а Екстра лесното масло за домаќинство за 40 денари за литар.

Новата цена на ЕУРОДИЗЕЛ-от ќе изнесува 51,50 денари, а малопродажната цена на мазутот се зголемува за 2,172 ден/кг и тој сега ќе се продава по цена од во однос на цена од 26,033 ден/кг.

Регулаторната комисија за енергетика соопшти дека новите цени на бензините се поради повисоката цена на суровата нафта на светскиот пазар и понискиот курс на денарот во однос на доларот во изминатиот 14 дневен период.

Наместо покачување, пензиите покуси од Септемвриските

Пензионертите се разочарани. Пензиите во месецот октомври се помали за 150 до 250 денари во однос на септемвриските пензии.

Пензионерите очекуваат линеарно  зголемување на пензиите од 600 денари кое беше пракса на претходната влада, меѓутоа од новата власт добија намалување на пензиите..

Кога се презентираше предлог буџетот за наредната година, Министерството за финансии напомена дека ќе има екстра зголемувања за пензионерите. Исто така и СДСМ за време на изборниот период даде ветувања дека ќе има покачување на пензиите, а сега со доаѓање на власт, пензионерите први ја плаќаат нивната неодговорност.

Колку ќе биде К-15 за 2017-та година?

Регресот за годишен одмор или К-15 и оваа година ќе им следува на вработените во приватните компании од македонското стопанство. Фирмите коишто не го исплатиле во претходните 10 месеци ќе мораат тоа да го направат во ноември и декември, а во случај да не го исплатат предвидени се парични и затворски казни за работодавачите.

Висината на К-15 се одредува врз основа на податоците за износот на просечната нето и бруто плата по вработен исплатена во последните три месеци. Врз основа на овие пресметки, минатата година тој износ беше најмалку 8.909 денари – најмалку 40% од просечната нето плата, а најмногу до 13.116 денари – најмногу до 40% од просечната бруто плата по вработен објавена за последните 3 месеци.

ДАЛИ ТРЕБА ДА СЕ ОЧЕКУВА ПОВИСОК К-15 ЗА 2017?

Зголемувањето на минималецот од 10.080 на 12.000 денари и постојаниот пораст на просечната бруто и нето плата по вработен во Македонија се двата фактори кои влијаат на тоа работниците на крајот од годината да добијат поголем износ за К-15 во однос на оној кој беше исплатен минатата година.

Нашата пресметка врз основа на податоците на Државниот завод за статистика (ДЗС) за движењето на просечната нето и бруто плата во месец јуни покажа дека износот на К-15 за секој вработен во Македонија треба да се движи во интервал од 9.123 до 13.403 денари.

Доколку истата пресметка ја адаптираме на најновите податоци на ДЗС за месец август, тогаш износот на К-15 за 2017 година би бил уште поголем во однос на бројките добиени за месец јули. Така, минималниот износ на к-15 би бил 9.164 денари (40% од 22.912 – просечна нето плата по вработен за август), а максималниот износ би изнесувал 13.470 денари (40% од 33.675 – просечната бруто плата по вработен за август).

Министре, задржете си ги тие 5% за патни трошоци!

Отворено писмо до Министерот за финансии и Владата на Република Македонија

Почитуван господине Mинистер,

Повод за моето обраќање е Вашата објава на плановите за Буџетот  за 2018 година. Морам да Ви кажам дека многу ме изненадивте. И не само мене, туку и останатите вработени во образованието. Трпеливо, како и секогаш, чекавме да поминат 100 дена, да поминат локалните избори и други важни работи и да дојде времето на распределба на средства за да видиме колку новата власт ќе ја процени работата во еден од најважните сегменти на државата – образованието.

И дочекавме – 5% од следниот септември.

Господине Министер, нѐ навредивте, повредивте и згазнавте по нашето достоинство.

Не треба некој да биде голем математичар или економист за да пресмета дека тие 1.050 (и со зборови – илјада и педесет) денари месечно до септември ќе бидат изедени од поскапувањата што следат (вода, нафта,… и така натаму низ доминото). Ние, просветните работници, сме навикнати на мали плати и потценување на нашата работа. Но, сепак, треба да бидете доблесни и да не газите врз нас како луѓе и врз нашето достоинство. Сепак, ние ги образуваме и заедно со вас ги воспитуваме вашите деца. Исто како што ве образувавме и воспитувавме и Вас и вашите колеги од Владата.

Почитуван Министре, многу од нас очекуваме вистински промени во управувањето со државата. Пред сѐ, очекуваме почитување на правото, како што ветивте како Влада.

Затоа, Ви препорачувам да го прочитате Колективниот договор за средно образование како правен акт со кој се уредува плаќањето во средните училишта (член 35.). Доволно е да го почитувате потпишаното, на што со години чекаме како фела. Ако не ви е јасно за што зборувам, вработените во образованието треба да се исплаќаат со определен коефициент според сложеноста на работата.

Не е сложено. На ист начин се исплаќаат и платите на пратениците, функционерите и други избрани лица. Само што, нивниот коефициент е врзан со просечната, а нашиот со минималната плата. Инаку математичката операција е иста – множење со коефициентот кој е законски определен. Значи, она што треба да е приоритет на Владата е почитување на законите и исплаќање според важечките прописи. Тоа нека биде еден мал чекор кон создавањето на одамна изгубената правна држава која ветивте дека ќе ја вратите. Правна држава со еднакво почитување на правото за сите. Откако тоа ќе се направи и испочитува ќе нема потреба од паушални покачувања. Тие автоматски ќе се добиваат со покачувањето на минималната плата.

Исто така, очекувам исполнување на ветувањето за чесно и транспарентно владеење. Ако сме во тешка финансиска криза, тогаш е чесно тоа и да се објави. Би ценела кога би дале предлог сите вработени во буџетските установи (од оние без квалификации, па до министрите и премиерот) да примаат минимален личен доход една или две или колку што е потребно години, за да ја спасиме државата од банкрот. Од патриотизам. Ова јас така, лаички. Можеби Вие, како економист, Универзитетски професор и Министер ќе имате подобро и побезболно решение. Само – објавете го. Чесно и транспарентно.

Она што особено ме радува последнава годинава е будењето на граѓаните на Македoнија. Можеби на многу тежок начин, но тие научија да размислуваат и да разликуваат популистички потези од вистински реформски промени.

Затоа, Ве молам да им се извините на вработените во образованието за овој ваш непромислен потег, да го повлечете предлогот за покачување на платите од 5%  и да размислите добро, пред да дадете друг предлог. Или, задржете си ги тие 5% за вашите патни трошоци.

Знам дека можете подобро. И другите членови на Владата можат да Ви помогнат во овие тешки времиња. Вие не сте влада на единичари. Вие сте образовани низ овој систем и очекувам да покажете почит кон оние кои ви помогнале да го стекнете вашето образование и да го постигнете во животот она што сте го постигнале.

Пишува: Фросина Митрушева

(Авторката е професорка во средно училиште и граѓанска активистка)

Извор: Цивилмедиа.мк

Популарно