На настанот "Women in Hollywood" во организација на магазинот ELLE, посебна награда врачи Џенифер Лопез на својата колешка Лејди Гага. Од неодамна и глумица во успешниот мјузикл "A Star Is Born", Гага дошла на сцената во предимензионирано одело, се заблагодари и го започна емотивниот говор кој предизвика солзи.
"Пробав неколку вечерни тоалети за вечерва, но не сакав да ја поттикнам тезата дека жените се овде само за да бидат убави и меѓусебно да се натпреваруваат, на големо задоволство на јавноста. Поради тоа се одлучив за одело. Како жртва на сексуално насилство од маж од оваа индустрија, како жена која сè уште не е доволно храбра да го каже неговото име, како жена која живее со хронична болка и како жена на која мажите ѝ кажувале што требало да прави, денес одлучив да ја преземам моќта во свои раце. Денес носам панталони", рекла на почетокот.
Зборуваше за тоа како преживеала сексуално насилство кога имала само 19 години и дека потребни ѝ биле долги години за да се помири со тоа и конечно да проговори.
"Засекогаш се променив после тоа. На никој не кажав, ниту ни самата не сакав да си го признаам. Чувствував срам, го чувствувам и денес додека стојам пред вас. Се срамам поради тоа што го доживеав. Сè уште има денови кога мислам дека јас сум виновна. Откако на моќните луѓе во оваа индустрија им кажав што ми се случи, никој не сакаше да ми помогне. Никој не ми понуди рака, никој не ме упати на местото каде ќе се грижам за моето ментално здравје. Тие ме повлекоа бидејќи сакаа да ја задржат својата моќ, а потоа се повлеков и јас - сè додека не започнав да чувствувам физичка болка", рекла пејачката.
"Многумина сметаа дека тоа е измислено. Но, јас ќе Ви кажам што е тоа. Синдром кој се состои од болка предизвикана од стрес. Депресија, потешкотии, пореметување во исхраната, трауми - тоа се само некои пример од она што може да доведе до торнадо од болки. Мораме заедно да работиме за да им помогнеме на оние на кои им е потребна помош. Имам среќа бидејќи денес имам каде да одам, но многумина ги немаат тие можности. Не можам да му платам на некој да им помогне и тоа е проблем кој мора да се реши. Тоа за мене значи да се биде жена во Холивуд - да се има платформа преку која можеш да ги промениш работите", рекла Гага, која присуствуваше заедно со вереникот Кристијан Карино.
