Полицијата спречи околу 50-тина граѓани кои се појавија на најавениот марш против насилствата да се упатат кон Музејот на холокаустот.

Еден од организаторите на маршот Зејд Реџепи од невладината организација „Клуб елита“ побара од полицијата да им објасни на граѓаните зошто им е ограничено правото на движење-пишува А1он.

- Јас сакам да знам причина зошто не е дозволено да го оствариме правото на мирен протест пред Музејот на холокаустот. Жалам што Македонија има ваква власт и полиција, ја срамите државата – изјави Реџепи. Тој доби одговор од еден полициски службеник дека полицијата не дозволува пристап до Музејот на холокаустот поради безбедносни причини и побара за тоа да се обратат до МВР.

Присутните на маршот против насилствата во Газа носеа транспаренти „Да се обединиме за Паленстина“, „Сакам да живеам“ и извикуваа пароли „Израел терорист“. За време на мирниот марш, силно полициско обезбедување беше распоредено и на плоштадот „Филип Втори“.

Во поворката имаше и дваесетина деца облечени во бели наметки на кои имаше црвена боја, веројатно со намера да побуди асоцијацијата дека во воените дејства во Газа страдаат многу деца. По речиси 40-тина минути, граѓаните се разотидоа, а полицијата се повлече.