Според некои информации камерите кои се поставени низ Скопје, ќе проработат од први Јануари? Целиот проект има повеќе функции, кои главно може да се поделат во две сфери, едната превентивна, другата истражна, од аспект на документирање сообраќајни прекршоци и кривични дела.

Не ретко досега се случуваше да има контрадикторни информации што во голема мера ја забавуваа истрагата. Камерите позитивно ќе влијаат и на возачите и на пешаците повеќе да внимаваат на своето движење. Скопските возачи први ќе бидат под будното око на објективите што ќе ги бележат и ќе ги пишуваат сите прекршоци и ќе се „закануваат“ со парична казни и со казнени поени и привремено или трајно одземање на возачката дозвола. Чувството дека „некој те гледа“ и казните преку пошта од 100, 200 или 300 евра ќе направат секој возач да биде повнимателен – вели еден приватен стопанственик од Скопје.

Камерите ќе ја подобрат дисциплината на возачите, сметаат таксистите. Кога ќе знаеме дека се снима, сигурен сум дека секој возач ќе си биде полицаец сам себеси и дека нема да му треба таков луксуз да поминува на црвено и да запира каде што ќе му падне на памет – вели еден претседател на групација на автотакси-превозници на градот Скопје.

На фотографијата што ќе ја снимат камерите јасно ќе се гледаат локацијата, времето и регистрацијата на автомобилот. Фотографијата ќе се испраќа во командниот центар на МВР, кој ќе биде поврзан со сите камери во градот. Заедно со видеозаписот и со фотографијата полицијата прави записник за казна за сторениот прекршок и му го испраќа на домашна адреса на сопственикот на возилото.