Зоран Ставрески на митингот во Прилеп, покрај многубројните проекти, како еден од поважните го издвои отписот на долговите со кој ќе се помогне на најранливите категории.

Носителот на листата во ИЕ 4 на ВМРО-ДПМНЕ и коалицијата „За подобра Македонија“ Зоран Ставрески на митингот во Прилеп порача дека воопшто не сака да се споредува со СДСМ и опозицијата, бидејќи таква споредба не може да се направи, бидејќи споредба не може да се прави со некој што нема програма и некој што нема проекти.

Ставрески потенцираше дека СДСМ иако ја бара поддршката на прилепчани, сепак ниту еднаш го немаат спомнато Прилеп во своето книжиче кое, како што рече, го нарекуваат програма.

-Погледнете ги луѓето кои стојат зад програмата и ќе направите разлика. Земјоделците знаат што е разликата. Субвенциите тогаш беа на нула, а со нас 550 милиони евра во изминативе 7,5 години заминаа кај земјоделците, а голем дел замина и кај тутунарите. Разлика знаат да направат и пензионерите кои порано беа поделени во групи. Првата група ја земаше пензијата околу први, а останатите групи чекаа на ТВ да кажат кога ќе биде нивната пензија. Пензионерите знаат како работиме ние. Беше криза, беше тешко, но за пензионерите секогаш имаше пари. Секогаш на први ја добиваат пензијата, секогаш кога имавме можност ја зголемувавме пензијата, како што е случај со последното покачување при кое секој пензионер дома понесе дополнителни 600 денари, вели Ставрески кој потенцираше дека СДСМ имаше можност да ги покачи пензиите, да изгради училишта, болници, да изгради патишта, но излажаа.

Toj воедно потенцираше дека довербата се дава за сторени дела, не за празни зборови, бидејќи оној што имал шанса нешто да изгради и не го сторил тоа, повторно ќе излаже.

Ставрески на митингот во Прилеп како еден од најважните проекти го издвои отписот на долговите за граѓани кои спаѓаат во три категории кои ги спомна. Со овој проект ќе им се помогне на најранливите категории на граѓани, или над 50.000 семејства во Република Македонија.

-Сите граѓани кои спаѓаат во категории приматели на социјална помош, семејство каде двајцата се невработени, или ако е само еден во семејство и е невработен подолго од 12 месеци, трето семејствата во кои што поради смрт или тешка болест се променила материјалната состојба и неможат да си ги платат долговите ќе им бидат отпишани долговите за струја кон ЕВН, долговите кон банките за тековни сметки, салда за потрошувачки кредити, минусно салдо на тековна сметка и кредитни картички и долговите за радиодифузна такса. Ние ставаме само проекти кои се реални и остварливи. Ние веќе разговараме со ЕВН и банките на кои ќе им простиме данок од една или две години или повеќе години, а за толкав износ тие ќе им ги отпишат долговите. Со тоа ќе им помогнеме на најранливите категории на граѓани, на најсиромашните, оние на кои им је најпотребна помошта, потенцираше Ставрески.

Ставрески воедно спомна дека во програмата има проекти кои се наменети за младите луѓе, но и младите семејства, како што се намалувањето на ДДВ за училишен прибор и бебешка опрема, потоа субвенционирање на компаниите кои ќе вработуваат млади лица до 29 години, а секој млад човек од Владата на РМ може да добие 7 илјади евра за да започне сопствен бизнис.

Тој додаде дека новата програма е базирана на економскиот развој и отворање на нови работни места. Во услови на светска и европска економска криза, каде се затвораа фрабрики, во Македонија се отвораа. Се создадоа нови 119.000 работни места, а во наредниот период планирани се нови 64.000.

На крајот Ставрески ги повика прилепчани на 27-ми масовно да излезат и да гласаат за Ѓорге Иванов за нов претседателски мандат.