Кливленд поведе со 2-0 во финалето на источната конференција во НБА, а најзаслужен за тоа е секако „кралот“ Леброн Џејмс. Тој втор натпревар по ред го предводеше својот Кливленд до значајна гостинска победа кај Атланта во конференциското финале (94:82), но сепак најдобриот кошаркар на Кавалирс доби едно мало предупредување од нашиот Перо Антиќ уште во првата четвртина од мечот во „Филипс“ арената.
За разлика од неговиот колега Кајл Корвер кој пред два дена избега како мало дете по едно пробивање на Леброн, овојпат Перо покажа заби и со груб старт го спружи на земјата „кралот“ Џејмс. Сепак, Антиќ беше казнет со намерна лична грешка од судиите, а Леброн на крајот го заврши натпреварот со 30 поени, 11 асистенции и 9 скока. Македонскиот кошаркар за 13 минути минати на паркетот придонесе со само 1 поен, 1 асистенција и 5 скока, додека најефикасен во редовите на Атланта беше Денис Шродер со 13 постигнати поени.
