Скопјанецот Д.Ш.(35) се бори за живот откако настрада во тешка сообраќајна несреќа која се случи вчеравечер околу 18.24 часот на крстосницата од бул. „Св.Климент Охридски“ и ул. „Димитрија Чуповски“ во близина на училиштето за средно образование „Јоси Броз Тито“ во Скопје.
Несреќата се случила помеѓу патничко моторно возило „шкода јети“, сопственост на МВР на Р.М. управувано од полициски службеник од ПС ОН Чаир и мотоцикл „јамаха“ со скопски регистарски ознаки, управуван од Д.Ш., велат од МВР.
- Полициското возило беше без вклучено ротациско светло и сигнализација, непрописно сврте полукружно, при што се судри со моторот - раскажува еден од очевидците.
Момчето кое го возело моторот паднало на асфалтот откако било исфрлено неколку метри во воздухот.
Во незгодата мотоциклистот се здобил со тешки телесни повреди и бил пренесен во Ургентен центар „Мајка Тереза“, каде му бил извршен оперативен зафат и се наоѓа во критична состојба.
Полицискиот службеник се здобил со телесни повреди и истиот бил задржан во Ургентниот центар. По наредба на Јавен обвинител увид на местото на настанот извршила екипа на СВР Скопје.
