МВР КОНЕЧНО распиша потерница по убиецот на Мартин Јанушев

Имаме несоборливи докази дека лицето Ф.С. е сторител на убиството на Мартин Јанушев, информираше денеска министерот за внатрешни работи Оливер Спасовски при посетата на СВР Скопје.

– Поднесена е кривична пријава, а стапуваат и другите мерки кои треба да бидат преземени во смисла на меѓународна потерница итн. за обезбедување на лицето и целосно расчистување на случајот, рече Спасовски.

Додаде дека имаат индиции за местото каде што се наоѓа сторителот и во моментот МВР е насочено на неговото откривање.

28-годишниот Мартин бил син на полициски службеник и брат на вработен во единицата Алфи.

Тој беше застрелан на 3-ти ноември, околу 18 часот пред влезот на зградата во која живеел, во населбата Аеродром.

Дел од очевидците раскажаа дека врз него било стрелано 4-5 пати во пределот на главата и вратот.

Јанушев играше за клубот „Локомотива“, а претходно кариерата ја градеше во клубовите „Маџари Солидарност“ и „11 Октомври“.

Синот инвалид го чекал таткото да заспие за да го избоде

29-годишниот инвалид Г.Б. од Штип со нож го убил својот татко Т.Б. (62) додека тој спиел. Синот имал помош од својот пријател И.Д. (24) кој претходно со тупаници го удирал сега починатиот по лицето, а потоа синот со нож му нанел неколку смртоносни убоди во пределот на главата.

Претходно меѓу нив имало расправија, но синиот чекал да се стемни и татко му да заспие.

Г.Б. е познат меѓу штипјани како инвалидно момче кое низ градот се движи со количка, но често пати го гледале како ја вози количката под дејство на алкохол, објави СДК.

Против Г.Б. и неговиот пријател И. Д полицијата поднела кривична пријава, а истражен судија во претходна постапка и на двајцата им одредил мерка притвор од 30 дена.

Портпаролот на судот Саше Георгиев информира дека за ова мерка биле повикани лекари специјалисти кои оцениле дека неговата инвалидност не е пречка за да ја издржува мерката притвор и дека неподвижноста повеќе била резултат на употребата на алкохол.

Уште едно детенце почина на Детската клиника во Скопје

Две и пол годишно дете почина на Клиниката за детски болести, каде цела недела го лечеле од грип. Директорката тврди дека детето имало посериозни заболувања.

Две и пол годишно машко дете од Штип викендов починало на Детската клиника во Скопје, потврдија оттаму за Алфа. Веќе една недела детето се лекувало од грип, но имало и сериозни проблеми со белите дробови, рече во телефонска изјава директорката Катерина Ставриќ, која не сакаше да зборува во камера. 

Директорката рече дека детето имало и повеќе сериозни заболувања со кои периодов се измачувал неговиот организам, а се соочувал и со пневмонија.

Во меѓувреме преку соопштение се огласија од Клиниката за детски болести.

- Пациентот Ј.Ц, роден 2015 година е примен на Клиниката на 7 јануари во тешка состојба, со покачена телесна температура и наод кој одговара на акутна бронхопневмонија. Хоспитализиран е на Одделот за пулмологија од каде во неколку наврати поради влошување на состојбата бил лекуван и на Одделот за Интензивна нега и терапија. Лабораториски за време на престојот е докажана инфлуенца Б, велат од Клиниката за детски болести.

Од Клиниката велат дека доцна синоќа дошло до нагло влошување на состојбата на детето и тоа било преместено во Одделот за Интензивна нега, но сите обиди за реанимација останале без успех.

- Инаку се работи за пациент со Даунов синдром, кај кој по раѓањето е дијагностицирана хипотиреоза и Вест синдром - тешко неврололошко нарушување кое предизвикува епилептични напади поради кои пациентот прима редовна антиепилептична терапија. Во текот на минатата година Ј.Ц бил во неколку наврати лекуван на Клиниката за Детски болести од пролонгирана и комплицирана пневмонија, велат од Клиниката. 

Родителите на починатото дете, како што рече директорката на детската Клиника, не сакале да се направи обдукција.

Во меѓувреме Клиниките низ цела држава се соочуваат со сериозен недостаток на медицински кадар. Докторите постојано заминуваат на работа во странство, но и во приватните клиники, додека на местото на пензионираните медицински сестри и доктори, не се вработуваат нови кои ќе ги заменат. 

И додека власта размислува каде да го изгради новиот Клинички центар и да ги подобри условите за лекување, болниците постојано голтаат човечки животи, а ситуацијата низ цела држава станува се поалармантна. 

Ги прегазил со возило, па пукал со пиштол!

Четири лица се повредени во инцидент што попладнево се случи  во Бутел на улицата „Бетовенова“.

Од министерството за внатрешни работи велат дека во 14.50 часот дошло до физичка пресметка, најверојатно поради нерасчистени имотно-правни односи, помеѓу браќата Ј.И. и Ј.И. и нивниот зет за сестра Е.Д. од една страна и браќата Џ.Д. и А.Д. од другата страна.

„Ј.И., Ј.И. и Е.Д. дошле пред куќата на Џ.Д. и настанала физичка пресметка. А.Д., кој во тој момент доаѓал со патничко возило „Пасат“ и видел што се случува, со возилото удрил во Ј.И., Ј.И. и Е.Д., а потоа со пиштол пукал два пати во воздух. Од ударот со возилото повредени се Ј.И., Ј.И. и Е.Д., а од физичката пресметка повреден е Џ.Д. На лице место е пронајден пиштол и две чаури. Со возило на Итна медицинска помош Џ. Д. е пренесен во Ургентен Центар, Ј. И. е пренесен во ГОБ Св. Наум Охридски, Ј. И. и Е. Д. се пренесени во ГОБ 8-ми Септември, а А. Д. е приведен во ПС Чаир“, велат од МВР.

Полициски службеници веднаш по пријавата излегоа на местото на настанот и се преземаат мерки и активности за расчистување на случајот.

Популарно