Минималната плата се зголемува на 14.500 денари

Економија

на 10.2019

Од декември минималната плата во државата ќе изнесува 14.500 денари. Тоа значи дека таа ќе се зголеми за две илјади денари од сегашните 12.507 денари. Зголемувањето на минималната плата ќе важи не само за приватниот, туку и за јавниот сектор.

Ова вчера го најави владиниот економски тим предводен од премиерот Зоран Заев по состанокот со коморите, работодавачите и синдикатите, нагласувајќи дека решението е донесено преку социјален дијалог со сите социјални партнери.

– Во 2017 година ја зголемивме минималната плата за 3.500 денари и досега изнесуваше 12.507 денари. Сега ја зголемуваме дополнителни 2.000 денари и ќе изнесува историски највисоки 14.500 денари. Со законот кој се усвои во 2017 година првпат се изедначи минималната плата и за работниците од текстилната и кожарската индустрија со другите гранки. Со изедначувањето на минималната плата за сите категории на работници исправивме една голема социјална неправда која постоење во нашето општество, изјави премиерот Заев.

Тој се надева дека зголемувањето на минималната плата ќе предизвика и спирално покачување на останатите плати во државата и е оптимист дека до крајот на мандатот ќе го исполнат ветеното за минимална плата од 16.000 денари и просечна плата од 30.000 денари.

Зголемувањето на минималната плата, според работодавачите, не ја исклучува можноста помалите текстилни компании да не можат да го издржат притисокот и да бидат затворени.

– Најголем притисок од порастот на минималната плата ќе имаат трудоинтензивните дејности. Мислам дека пазарот ќе успее да ги прифати вработените од евентуалните затварања на овие помали компании кои не работат директно со клиенти, туку земаат работа преку втора -трета рака и оти овие вработени ќе се вработат во оние конфекции кои ќе обезбедат поголема продуктивност, подобри услови за работа и почитување на работничките права, рече претседателот на Организацијата.

Според вицепремиерот за економски прашања Кочо Анѓушев, нема да биде голем бројот на малите текстилни компании што не ќе можат да го издржат притисокот од зголемувањето на минималната плата.

– Минималната плата е заштита за најзагрозените категории на вработени кои немаат алтернатива во делот на мобилноста поради својата возраст или други причини. Со минималната плата не правиме притисок врз компаниите, напротив се обидуваме да им помогнеме со две мерки – субвенционирање на придонесите и со законот за финансиска поддршка, рече Анѓушев.

Оние компании што не ќе можат да ја исплатат загарантираната минимална плата, ќе имаат опција да ги користат и можностите што ги нуди Законот за субвенционирање на плати кој е во собраниска процедура и се очекува да стапи во сила во ноември.

– Минималната плата е загарантирана како 14.500 денари и таа стартува од декември. Мерката за субвенционирање на платите се однесува на покачување од минимум 600 до максиум 6.000 денари и државата го покрива придонесот за покачувањето. Ако покачат 2.000 денари во ноември со исплата во декември, тогаш тие ја покачиле минималната плата и ќе ги искористат субвенциите за покачување на платата. Значи мерките се комплементарни една на друга, но тоа не значи дека сите ќе ја покачат минималната плата користејќи субвенција. Некој ќе ја покачи со субвенција, некој без субвенција, но во секој случај даваме опција бизнис секторот кој не може да го издржи ова покачување, да може да ја искористи мерката за субвенционирање, појасни министерката за труд и социјална политика Мила Царовска.

Досега 90 илјади граѓани примаат минимална плата од 12.500 денари.

MИА

Добри вести за возачите: Горивата со нови цени

Економија

пред еден ден

Бензините од ноќеска на полноќ поевтинуваат за еден денар по литар, а цената на дизел горивата се намалува за половина денар, одлучи денеска Регулаторната комисија за енергетика, водни услуги и услуги за управување со комунален отпад (РКЕ). Со одлуката се врши намалување на малопродажните цени на нафтените деривати во просек за 0,83 отсто во споредба со претходната пресметка.

Новата малопродажна цена на ЕУРОСУПЕР БС-95 е 73 денари за литар, ЕУРОСУПЕР БС-98 ќе се продава за 75, ЕУРОДИЗЕЛ (Д-Е V) за 68, а Екстра лесното масло за домаќинство (ЕЛ-1) за 67,5 денари за литар.

Со одлуката на РКЕ за 0,001 денар по килограм се зголемува малопродажната цена на Мазутот М-1 НС и изнесува 36,661 денари.

Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат намалување кај бензините во просек за 3,358 отсто, кај дизелот за 2,566, кај екстра лесното масло

за 2,450 и кај мазутот за 0,645 отсто. Курсот на денарот во однос на доларот по кој беа формирани цените со претходната пресметка е повисок за 0,5110 отсто.

Криптоманија: Колку чини биткоинот денеска?

Економија

пред 11 месеци

Биткоинот, најпопуларната криптовалута во светот, речиси три недели се движи околу психолошката граница од 100.000 долари, но никако да ја премине. Денеска изутрината 1 биткоин чини 98.350 долари, но вредноста вообичаено варира од час во час.

Повеќето криптовалути, а особено биткоинот, забележаа пораст на берзите како реакција на победата на Доналд Трамп на претседателските избори.

Пред гласањето, биткоинот чинеше околу 68.000 долари, но кога се дозна дека Трамп ќе победи, за само неколку часа вредноста се крена на над 80.000 долари, а неколку дена подоцна и над 90.000 долари. Веќе со денови се очекува моментот кога биткоинот ќе надмине 100.000 долари.

Народната банка на Република Северна Македонија нема криптовалути во курсната листа, зашто нашата тековна законска рамка не познава термин „крипто-средство“.

– Во основа, крипто-средствата се сметаат за специфичен вид нематеријално средство, засновано на одредени технологии, коешто не е издадено ниту, пак, неговата вредност е гарантирана од централна банка, не претставуваат пари и понудата на овие средства не зависи од потребите на економијата или монетарниот систем – наведува НБРСМ на својата страница на интернет.

Вредноста на биткоинот надмина 80.000 долари

Економија

пред 11 месеци

Цената на криптовалутата Биткоин денеска за првпат го надмина прагот од 80.000 на платформата Bitstamp.

Најстарата и најпознатата криптовалута се искачи за над четири проценти во споредба со претходниот ден, достигнувајќи до 80.047 долари.

Во изминатите седум дена, водечката криптовалута доби повеќе од 17 проценти во вредност. Другите криптовалути како Етер или Солана се зголемија уште понагло.

Аналитичарите стабилното зголемување го припишуваат на новиот политички пејзаж во САД по победата на Доналд Трамп на претседателските избори, пренесе ДПА. Поранешниот и иден претседател на САД беше поддржан од поголемиот дел од крипто заедницата за време на изборната кампања.

Трамп беше многу негативен за Биткоинот за време на неговиот прв мандат, од 2017-2021 година, но активно се додворуваше на крипто заедницата во овогодишната кампања за реизбор.

На големата конференција за Биткоин во Нешвил, Тенеси, Трамп вети дека ќе го задржи крипто пазарот во голема мера нерегулиран и ќе обезбеди евтина електрична енергија за „копање“ нови биткоини.