Според последната листа на руското Министерство за одбрана, од почетокот на војната досега на страната на Украина се бореле 90 македонски државјани, од кои убиени или елиминирани се 30.

Нема информација дали и колку во моментов има македонски државјани кои учествуваат во воените дејствија.

„Од 24 февруари 2022 година, 13.387 странски платеници кои се борат за неонацистите пристигнаа во Украина. До денес, 5.962 од нив се елиминирани“, објави Министерството.

Според табелата објавена од руското Министерство, најмногу платеници се од Полска (2960). Убиени се 1497. Што се однесува до Европа, следуваат Велика Британија, Романија и Хрватска.

Руското министерство наведува дека 1.113 Американци дошле да се борат во Украина, од кои 491 биле елиминирани. По земјите од кои наводно пристигнале најмногу платеници следуваат Грузија (1042, од кои 561 се елиминирани) и Канада (1005, од кои 422 се елиминирани).