Под геоглифот во светиниколското село Црнилиште има огромен комплекс од три простории: една помала и две поголеми со димензии од околу 18 метри ширина и 11 метри должина, а пред нив голем елипсоиден ходник. На средината поминува река која се двои на два дела како гејзир или фонтана, што наведува на фактот дека се работи за ритуално, култно место бидејќи во минатото значајните објекти, па и градовите, се граделе во близина на извори со жива вода.
Сето тоа е прикажано на 3Д-скиците кои ги изработи професорот Аристотел Тентов врз основа на резултатите од електромагнетното и акустично истражување на локалитетот што на двапати лани го вршеа меѓународни експерти.
- По неколку месеци од истражувањата, ја добиваме сликата за тоа што всушност се крие под геоглифот. Се работи за комплекс што зафаќа површина од 100х70 мери и има три простории за кои сметам дека е можно дека се гробниците на македонските божества: Творецот на универзумот, Големата Мајка и нивниот првороден син, богот Ѕе. Звукот што е снимен, а произлегува од овалната просторија, според мене служи како резонатор што го трансформира звукот со интервал на голема прецизност, но засега не би можел да објаснам за што точно се работи. Тоа останува да се види кога ќе се влезе внатре, вели професорот Тентов.
Тентов објаснува дека двете мали точки на сликата се изворите на водата и се на повисоко ниво - едната е југоисток, другата југозапад и го пренесуваат звукот и од просторијата и од водата која таму се движи. Трите комори се на длабочина на 11 метри од основата на влезот, а од влезот до нив има 15 метри должина со пад од 11 метри, што значи дека се поставени многу стрмно.
Вештачки објект стар околу шест илјади години
Професорот Тентов напоменува дека сите симболи се од демотско писмо (истото од Каменот од розета) и го претставуваат богот Ѕе, кој е првороден син на Големата Мајка и на врховниот бог на древните Македонци - творецот на универзумот. Самиот симбол - големата испрекршена стрелка што се наоѓа во вид на ровови на врвот на геоглифот, еднаш во годината, на 22 јули на роденденот на Александар Велики се пресликува со небесната слика на соѕвездието Касиопеја што е уште еден показател дека се работи за многу значаен сакрален објект.
- Дефинитивно се работи за многу вредна градба, вештачки објект кој најверојатно потекнува од пред шест илјади години. Претпоставувам некогаш бил отворен, но дека бил сокриен под заканата од Римјаните. Тоа се потврдува и со видот на земјата со која е затрупан, а различна од онаа од околината. Но, ќе повторам дека тоа треба да се потврди со археолошки истражувања, вели Тентов.
И самата градба е изградена врз принципот на Теслина физика, односно Теслини бранови кои современата наука не ги познава доволно и претставува предизвик за современата научна јавност. Тоа, според Тентов, исто така дава едно ново светло во историјата, не само македонската туку и на светската наука дека на овие простори опстојувала многу развиена цивилизација. Најверојатно, додава професорот, ќе се потврди теоријата дека Македонија е лулката на светот.
-Нас не учеа дека божествата се бесмртни. Меѓутоа, податоците од индиската цивилизација која доживеала контакти со македонската цивилизација 3.000 години пред новата ера, во периодот на Дионис, укажуваат дека Македонците своите богови ги прикажуваат како луѓе, со човечки лик, само што живееле многу подолго од еден човечки век, појаснува Тентов.
Се очекува дозвола за археолошко истражување
Локалната власт ги поддржува сите истражувачки проекти на својата територија, а конкретно за геоглифот, градоначалникот на Свети Николе вели дека по добиените првични резултати, од Управата за културно наследство веќе побарал дозвола за археолошко истражување. Заедно со македонските археолози ќе се вклучат и странски експерти, како најдобриот египтолог Ола Ел Агуизи, која ја носи титулата прв археолог на Египет, а и самата покажала интерес да дојде во Свети Николе.
Геоглифот во близина на Свети Николе стана популарен пред две години откако хрватскиот истражувач и археолог Домагој Николиќ во емисијата "На рубу знаности# објави дека во селото Црнилиште е откриен древен симбол на можна кралска гробница од времето на Пајонците, дури се сомневаше дека таму се наоѓа гробот на Александар Македонски или на некој владетел од неговата династија.
Но, ако археолозите ја потврдат теоријата на меѓународниот експертски тим кој учествуваше во неинвазивните истражувања, тогаш треба да очекуваме дека сме на прагот на големо, епохално откритие.
Вечер.мк
