Тинејџер започнал да пука во преполн автобус во њујоршкиот кварт Бруклин, објави телевизиската мрежа CBS.
Според телевизијата, во инцидентот што се случил изминатата ноќ, 14-годишниот осомничен напаѓач влегол во преполниот автобус и отворил оган. Еден од патниците, идентификуван како 39-годишниот Анхел Рохас починал од рани во главата, но нема информации за други повредени патници во автобусот.
Според њујоршката полиција, тинејџерот, чие име не е објавено, имал намера да пука во некој друг патник во автобусот, но случајно го погодил Рохас. По инцидентот, напаѓачот се обидел да се сокрие меѓу преплашените патници кои бегале од возилото, но набргу бил уапсен. Истрагата се обидува да дознае од каде малолетникот го набавил оружјето и која била причината да отвори оган во автобусот, пренесува CBS.
Тинејџерот е веќе обвинет за убиство и нелегално поседување на огнено оружје. Датумот на неговото судење, засега не е објавен.
