Откриени имињата на новиот директор на ГТЦ и 6-те нови членови на Управниот одбор

Вести

пред 3 дена

Угостителско-туристичкиот менаџер Никола Соколовски е назначен за нов извршен директор на АД Градски трговски центар. Тој доаѓа на местото на Ѓоко Трајчевски, кадар кој имаше поддршка од претходната власт.

Соколовски од Скопје по вокација е магистар на економски науки произведен на светиниколскиот Меѓународен славјански универзитет. Во последниве две години е оперативен директор на скопскиот „Интернешнл хотелс“ (поранешен „Континентал“ н.з.), а во претходните години ги поминал сите скалила во кариерно напредување во тој скопски хотел во кој почнал да работи во 2010 година.

Истовремено променет е комплетно целиот Управен одбор на шопинг центарот, а сега има седум наместо претходните шест членови. Покрај Соколовски, ќе членуваат уште и Ферик Белули, Јован Лукаров, Катица Грче, Виолета Блажевска, Васе Ангеловски и Александар Тасев.

Овие предлози беа изгласани минатата недела од страна на акционерското друштво во државна сопственост. Составот е разнолик и на прво гледање тешко се наоѓа НЗС меѓу неговите нови членови.

ГТЦ е компанија која порано беше трговска гордост на Скопје. И сега е едно од најфреквентните места, но неговата репутација не е ниту сенка од тоа што била пред дваесетина и повеќе години. ГТЦ е компанија која најмногу приходува од одржување што го наплаќа од кираџиите и од корисниците на околу 560 деловни единици (н.з. дуќани, кафиќи, ресторани).

Најголема приходна ставка е паркингот пред приходите од издавање деловен простор. Камен околувратник на државната компанија е превработеноста. А тоа е потврдено и во извештајот на директорите. Но, заради мир во политичките коалиции на власт досега никој не посегаше да го решава најголемиот проблем. ГТЦ има дури 194 вработени, а главна дејност му е да одржува деловни простори во вкупна површина од 46.000 квадратни метри. Безмалку 50 отсто од целиот расход е за плати на вработените.

Притвор за Весиќ, Танасковиќ и 11 осомничени, по едно лице издадена потерница

Балкан

пред 3 часа

Вишото јавно обвинителство во Нови Сад, по распит на 12 осомничени за несреќата на железничката станица во тој град, донесе наредба за спроведување истрага и поднесе предлог за приведување на 13 од нив, меѓу кои и едно лице кое е во странство, јави дописникот на МИА од Белград.

Меѓу нив се и министерот во оставка Горан Весиќ, поранешната министерка и в.д директорката на Железничката инфраструктура на Србија, Јелена Танасковиќ, како и поранешниот директор на Железничката инфраструктура на Србија, Небојша Шурлан.

За сите нив е предложен притвор за да не се мешаат во постапката со влијание врз сведоци и соучесници, за да не го повторат делото, како и поради вознемирување на јавноста. Според осомничената Ј. С. М., покрај наведените основи, а поради тоа што е недостапна за органите на прогонот, по неа е предложено да се распише и потерница.

– Осомничените Ј. Т, Г. В, А. Д. и Н. Ш. сториле кривично дело тешко дело против општата сигурност од Кривичниот законик во врска со кривичното дело предизвикување општа опасност, а осомничените С. Н, М. Ј, Љ. М. М, М. С, Д. Ј, М. Г, З. С.

М, Ј. С. М. и Д. Т. сториле кривично дело тешко дело против општата сигурност од Кривичниот законик во врска со кривичното дело Непрописно и неправилно изведување градежни работи, се вели во соопштението на ВЈТ.

Вишиот суд во Нови Сад претходно и одреди притвор до 30 дена на Љ. М. М.

Порталот Нова економија пред два дена објави дека меѓу уапсените е и Љиљана Милиќ Марковиќ, која е потпишана како Главен проектант.

Таа воедно е предавач на Архитектонско-градежниот и геодетски факултет во Бања Лука.

Уапсен е и Слободан Наумовиќ од Сообраќајниот институт ЦИП, проектантот на изградбата на реконструкцијата и адаптацијата на зградата на станицата во Нови Сад.

Како што дознава Нова економија, уапсени се и Дејан Тодоровиќ и Марина Гавриловиќ, инженери вработени во француската компанија Ежис.

Тодоровиќ беше ангажиран на функцијата Надзорен орган за инфраструктурни објекти на службени места, а Гавриловиќ беше Надзорен орган за архитектура на делницата 1, која ја опфаќа Железничката станица во Нови Сад.

Српскиот огранок на францускиот Ежис изврши директен надзор над работите на Железничката станица.

Засега никој не е уапсен од компанијата Проект Биро Утибер, српската филијала на истоимената унгарска компанија и главен член на конзорциумот кој ја доби работата да ја надгледува работата на целиот железнички проект од Белград до границата со Унгарија.

Според дел од српските медиуми министерот во оставка Весиќ од вчера стапи во штрајк со глад.

Во трагедијата што се случи на 1 ноември, кога се урна настрешницата на Железничката станица во Нови Сад, загинаа 15 лица, а двајца сè уште се во критична состојба.

Едно лице повредено во престрелка во Арачиново, вмешан и Шенки Версаче

Црна хроника

пред 5 часа

Попладнево се случила престрелка во скопско Арачиново во која инволвиран бил Шенол Маслани во јавноста познат како Шенки Версаче, дознава 4news.

Повреден во престрелката е Шенад Ајдини.

Инаку да потсетиме, Шенол Маслани е брат на Фарук Маслани кој беше помилуван од страна на претседателката Гордана Силајновска, што наиде на рекации од јавноста.

Македонски автобус се излизга на автопатот во Србија, нема повредени

Македонија

пред 14 часа

Синоќа македонски автобус доживеал сообраќајна несреќа на автопатот А5 во близина на Појате, Србија, објавија српските медиуми.

Несреќата се случила поради обилните врнежи од снег, кои го отежнале движењето на возилата. Автобусот се излизгал на лизгавата подлога и удрил во заштитната банкина.

За среќа, во инцидентот нема повредени патници. Сепак, причинета е значителна материјална штета на автобусот.

Надлежните служби веднаш интервенирале на местото на настанот, а сообраќајот бил регулиран без поголеми застои. Упатен е апел до возачите да бидат исклучително внимателни во услови на лошо време.