Скопје влезе во историјата, само 25 автобуси се обраќаат во град со големина од над 800 илјади жители

Вести

пред 3 часа

Катастрофалната ситуација со ЈСП продолжува и денес. Од вчера попладне на градските улици се обраќаат само 25 автобуси – оние кои се движат на гас, додека останатите се паркирани во автобазите на ЈСП „Скопје“ во Автокоманда и Ѓорче Петров поради недостиг на гориво.

Африм Муча, претседател на Независниот синдикат на возачите во ЈСП „Скопје“ за МИА синоќа изјави дека состојбата е многу сериозна, дури и алармантна бидејќи, како што рече, речиси 70 проценти од возилата се паркирани.

„Одговорот е едноставен, нема нафта. Возачите беа повикани да дојдат на работа, но тие се во базите во Автокоманда и во Ѓорче Петров заедно со автобусите бидејќи нема нафта и ТНГ. Во моментов мислам дека околу 70 проценти од автобусите на ЈСП се паркирани во базите. Низ градот сообраќаат мал број двосменски автобуси кои имаат наточено нафта пред два дена, како и возилата со ТНГ. За нормално функционирање на ЈСП на дневна основа се потребни 25 тони нафта, што не ја добиваме. Нафтата вообичаено ни ја доставува „Пуцко Петрол“ во базите на ЈСП „Скопје“, но бидејќи должиме поголема сума на пари, деновиве не ни доставуваат нафта. Во ЈСП „Скопје“ работат 1.200 луѓе и нема да дозволиме некој да си поигрува со нивните судбини“, рече Муча.

И Миќо Стојановски од ССМ ЈСП Скопје потврди дека проблемот со јавниот градски превоз во Скопје и малиот број на автобуси кои сообраќаат низ градот е поради недостигот на гориво. Нема дистрибуција на нафта од „Пуцко Петрол“ за ЈСП „Скопје“ поради голем долг.

„Причина за тоа е меѓусебниот однос меѓу градоначалничката Данела Арсовска, претседателот на Советот на Град Скопје Трајко Славески и Советот на Град Скопје и одлуките кои ги носат. Имаше најава од Град Скопје дека ќе се нормализира дотурот на нафта за ЈСП, но тоа не се случува. Проблеми со нафта има и ЈП „Комунална хигиена“ Скопје поради што само дел од камионите собираат смет. Затоа сите синдикати на јавните градски претпријатија планираме од понеделник да одржиме заеднички состанок на кој ќе одлучиме какви мерки ќе преземеме“, изјави Стојановски за МИА.

Според приватните превозници, за да биде во целост исполнет зимскиот возен ред по одлука на Совет за линиски превоз на патници во Град Скопје потребни се 352 автобуса или со резервни вкупно 444 автобуси. Наведуваат дека во моментов на дневно ниво недостасуваат од 160 до 200 автобуси.

Додека ЈСП буквално се распаѓа Арсовска зборувала за климатските промени и човековите права на самитот Г20 во Бразил

Вести

пред еден час

Градоначалничката на Скопје била присутна на самитот Г20 што се одржа во Бразил во периодот од 14-17 ноември. Оваа вест ниту не беше пренесена од нејзинот кабинет, а немаше ниту било какво известување.

За ова се дознаваме од официјалната страна на Советот на Европа каде градоначалничката Арсовска го преставувала Конгресот на Советот на Европа каде говорела за климатските промени и човековите права.

Арсовска има присуствувано на многу настани организирани од фондации и држави, но она што може да се забележи е отсуството на известување од страна на нејзинот кабинет за нејзините активности.

Градоначалничката очигледно повеќе ги избира овие меѓународни настани, каде збори на теми кои не се во допирна точка со функцијата која ја извршува наместо да ги решава проблемите на скопјани, еден таков пример е катастрофалната ситуација со ЈСП.

Откриени имињата на новиот директор на ГТЦ и 6-те нови членови на Управниот одбор

Вести

пред 5 часа

Угостителско-туристичкиот менаџер Никола Соколовски е назначен за нов извршен директор на АД Градски трговски центар. Тој доаѓа на местото на Ѓоко Трајчевски, кадар кој имаше поддршка од претходната власт.

Соколовски од Скопје по вокација е магистар на економски науки произведен на светиниколскиот Меѓународен славјански универзитет. Во последниве две години е оперативен директор на скопскиот „Интернешнл хотелс“ (поранешен „Континентал“ н.з.), а во претходните години ги поминал сите скалила во кариерно напредување во тој скопски хотел во кој почнал да работи во 2010 година.

Истовремено променет е комплетно целиот Управен одбор на шопинг центарот, а сега има седум наместо претходните шест членови. Покрај Соколовски, ќе членуваат уште и Ферик Белули, Јован Лукаров, Катица Грче, Виолета Блажевска, Васе Ангеловски и Александар Тасев.

Овие предлози беа изгласани минатата недела од страна на акционерското друштво во државна сопственост. Составот е разнолик и на прво гледање тешко се наоѓа НЗС меѓу неговите нови членови.

ГТЦ е компанија која порано беше трговска гордост на Скопје. И сега е едно од најфреквентните места, но неговата репутација не е ниту сенка од тоа што била пред дваесетина и повеќе години. ГТЦ е компанија која најмногу приходува од одржување што го наплаќа од кираџиите и од корисниците на околу 560 деловни единици (н.з. дуќани, кафиќи, ресторани).

Најголема приходна ставка е паркингот пред приходите од издавање деловен простор. Камен околувратник на државната компанија е превработеноста. А тоа е потврдено и во извештајот на директорите. Но, заради мир во политичките коалиции на власт досега никој не посегаше да го решава најголемиот проблем. ГТЦ има дури 194 вработени, а главна дејност му е да одржува деловни простори во вкупна површина од 46.000 квадратни метри. Безмалку 50 отсто од целиот расход е за плати на вработените.