Косовско Претседателство: Случката со Османи на скопскиот аеродром е чиста провокација и намера да се предизвика инцидент

Претседателството на Република Косово во петокот излезе со соопштение до јавноста во кое ја изразува својата огорченост од „неприфатливите изјави на Министерството за внатрешни работи на Северна Македонија“, како и од „пропагандата што се развива против Република Косово“ по инцидентот со претседателката Вјоса Османи на скопскиот аеродром, јави дописникот на МИА од Приштина.

Во соопштението по повод инцидентот се наведува дека Османи единствено одбила да го даде на скенирање својот телефон, кој го користи како шеф на државата за официјални комуникации и за прашања од националната безбедност.

-Наместо да побара извинување, вчера и денеска (четврток и петок) Министерството за внатрешни работи на Северна Македонија целосно го оправда барањето на аеродромското обезбедување да го земе и скенира личниот телефон на претседателката на Република Косово, кој шефот на државата го користи за официјални комуникации и за прашања од националната безбедност. Претседателката со право одби такво нешто, врз основа на советите кои со години ги добива од самите безбедносни институции. Всушност, денеска скопскиот аеродром, како и самото Министерство за внатрешни работи, признаа дека наредбата е дадена од Министерството за внатрешни работи на Северна Македонија за ваква контрола, што е целосно во спротивност со правилата за постапување со шефовите на држави според дипломатските практики, се вели во соопштението на Претседателството.

Понатаму, оваа институција дава опис на инцидентот и ги споменува меѓународните практики. Претседателството наведува дека македонската страна претходно била официјално известена за патувањето на претседателката согласно дипломатските практики.

-Не е точно дека претседателката одбила да ѝ се скенира чантата. Прво, претседателката немаше багаж како што се пропагира во бројните реакции во медиумите во Северна Македонија. Значи, лага е дека одбила да ѝ го проверат багажот. Имаше лична рачна чанта која веднаш ја стави во скенерот, иако обезбедувањето, според практиката на меѓународната конвенција, немало право да бара такво нешто. Единственото нешто што претседателката одби да го предаде е нејзиниот телефон, се вели во соопштението на косовското Претседателство.

Во него се демантираат тврдењата дека претседателката имала „нешто сомнително во нејзината чанта“.

-Не само што е голема невистина, туку истовремено е и најсериозното обвинување и најсериозната пропаганда што досега медиумите во Северна Македонија ги упатиле кон Република Косово. Уште поскандалозно е денешното соопштение на МВР дека министерот за внатрешни работи на Северна Македонија имал некакви сознанија кои довеле до барањето да се провери личната чанта и телефонот на претседателката. Ова е невидена тенденција за оцрнување не само на претседателката, туку и на државата Косово. Северна Македонија треба да има предвид дека ваквата пропаганда се прави против една претседателка, која во текот на целиот свој мандат придонесе единствено за продлабочување на позитивните односи меѓу Косово и Северна Македонија.

Претседателството на Косово барањето за одземање на телефонот и негово ставање во скенерите го смета за однесување надвор од секаква пракса и протокол.

-Вчерашната ситуација на скопскиот аеродром не може поинаку да се објасни ниту да се оцени освен како чиста провокација и намера за предизвикување инцидент. Наместо изговори и дозволување пропаганда против Република Косово, бараме од официјалните власти во Скопје итно да го третираат случајот со висока сериозност и да преземат соодветни мерки против службените лица кои го извршија овој напад на Република Косово, порача косовското Претседателство.

Над 3.000 универзитетски професори во Србија ги поддржаа студентите

Повеќе од 3.000 универзитетски професори од Србија потпишаа отворено писмо за поддршка на студентите во нивните протести и барања. Бројот на потписници постојано расте, наведува Бета.

„Одлучно стоиме со нашите студенти во заедничката борба за подобро општество“, се вели во пораката на професорите. Тие остро го осудија секој обид на властите да ги заплашат студентите со јавно објавување на нивните приватни податоци и други форми на притисок.

Професорите упатија апел до надлежните институции да постапуваат совесно и одговорно во својата работа.

Ден на жалост во Србија поради трагедијата во Цетиње

Во Србија денеска е Ден на жалост поради убиството на 12 лица и ранувањето на четири лица во градот Цетиње, во јужна Црна Гора.

 Владата на Србија одлуката за Денот на жалост ја донесе на вчерашната седница на предлог на претседателот на Србија, Александар Вучиќ.

Седницата почна со едноминутно молчење за жртвите од масовното убиство во Цетиње.

На 1 јануари вооружен маж застрела седум мажи, три жени, меѓу кои и сестра му, и две деца на возраст од 10 и 13 години во Цетиње, по што се застрела во главата и почина на пат кон болница.

Четворицата тешко ранети се во болница.

Комеморација на Цетиње, трет ден на жалост во Црна Гора

По повод масакрот што се случи на 1 јануари во Цетиње, кога беа убиени 12 лица, денеска во Владиниот дом во овој црногорски град се одржа комеморативна седница во чест на жртвите.

Комеморацијата започна со минута молчење за жртвите, по што беше нагласено дека ова е еден од најголемите предизвици кои ги погодиле Цетиње и Црна Гора.

Градоначалникот на Цетиње, Никола Ѓурашковиќ, истакна дека со тагата која ги обедини сите, се собрале пред еден од најтешките предизвици што ја погодил заедницата.

– Уште една незапаметена трагедија ги погоди Цетиње и Црна Гора. Загубата на 12 животи не остави во шок и неверување. Особено боли загубата на двајца ангели, симболи на невиноста. Оставија празнина во нашите срца. Единствено што можеме е да изразиме искрено сочувство на семејствата и да им помогнеме во нивната болка, изјави Ѓурашковиќ.

Тој додаде дека ова не е само загуба за семејствата, туку и за целото општество.

– Сите треба да се запрашаме – зошто вакво нешто повторно се случи и зошто како општество го дозволивме тоа. Државата мора системски да реагира. Тоа им го должиме на жртвите и нивните семејства. Одговорноста мораме и сакаме јасно да ја бараме, подвлече Ѓурашковиќ.

На комеморацијата присуствуваа претседателот на Црна Гора Јаков Милатовиќ, министерот за надворешни работи на Црна Гора Ервин Ибрахимовиќ, бројни министри од Владата на Црна Гора, претставници на локалната власт, како и членови на семејствата на трагично загинатите.

Во пукањето што се случи на 1 јануари во Цетиње, беа убиени 12 лица, а шестмина беа повредени. Напаѓачот, Ацо Мартинојевиќ (45), по крвавиот напад изврши самоубиство.

Поради трагедијата на Цетиње, во Црна Гора беше прогласена тридневна жалост на 2, 3 и 4 јануари.

Популарно